Murat nasiropning heykeli ornitilmaqchi


2007.04.15

Buningdin üch ay burun moskwadiki öyining balkonidin chüshüp kétip, sirliq türde qaza qilghan ataqliq Uyghur naxsha cholpini we kompozitor murat nasirop heqqidiki inkaslar hem uchurlar rusiye metbu'atlirida yenila dawamlashmaqta.

"Hayatliq" gézitining uchuridin melum bolushiche, murat nasiropning yéqinliri uning üchün heykel ornitishqa tereddut qiliwatqan bolup, 15-mart küni moskwadiki 47 neper naxsha cholpini we sen'et erbabining qazaqistan sen'etkarliri bilen birliship almutida ötküzgen xatirilesh kéchilikidin kéyin, murat nasiropning yéqinliri, dostliri we rusiye sen'etkarliri birdek halda xatire kéchilikide chüshken pullarni meblegh qilip, merhum üchün almutida heykel ornitishni qarar qilghan. Moskwadin kelgen layhiligüchi merhumning heykili we meqberisining türlük nusxilirini muzakire qilghan.

Murat nasiropning almutadiki bir kesipdéshi, almuta Uyghur yashlirining murat nasiropning heykilini ornitish, hetta uning namini birer mektep we yaki kochigha bérish heqqide hökümet da'iriliri bilen sözlishiwatqanliqini eskertken idi.

Téxi yéqinda murat nasiropning sirliq ölümi moskwa teptish da'iriliri teripidin "özni öltürüwaldi" dégen yekün bilen xulasilan'ghan bolsimu, lékin kishilerning buningdin qayil emesliki xewer qilinmaqta. Rusiye metbu'atlirida yene murat nasiropning ikki milyon dollar qimmitidiki xususiy bayliqining kimge miras qaldurulushi heqqidimu uchurlar peyda bolmaqta. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.