ئالماتادا مۇرات ناسىروپنىڭ ھەيكىلى ئورنىتىلدى


2007-12-13
Share

قازاقىستاننىڭ كونا پايتەختى ئالمۇتا شەھىرىدىكى زارىيا ۋوستوكا مەھەللىسىدىكى قەبرىستانلىققا رۇسىيە ۋە پۈتۈن مۇستەقىل دۆلەتلەر ھەمدوستلۇقىغا مەشھۇر بولۇپ تونۇلغان ئۇيغۇر ناخشىچىسى، كومپوزىتورى مۇرات ناسىروپنىڭ ھەيكىلى ئورنىتىلدى.

ھەيكەلنىڭ يوپۇقىنى ئېچىش مۇراسىمى 13- دېكابىر كۈنى ئۆتكۈزۈلگەن بولۇپ، مۇراسىمغا مۇرات ناسىروپنىڭ ئائىلە -تاۋابىئاتلىرى، ئالمۇتادىكى ئۇيغۇر، قازاق قاتارلىق مىللەتلەرنىڭ بىر قىسىم سەنئەتكارلىرى، زىيالىيلىرى شۇنىڭدەك ئۇيغۇر جامائەت ۋەكىللىرى، ئوقۇغۇچىلار ھەمدە مۇرات ناسىروپنىڭ دوست - يارەنلىرى ۋە ئۇنىڭ ناخشىلىرىنىڭ مۇخلىسلىرى قاتناشتى.

مۇراسىمدا مۇراتقا ئاتاپ خەتمە-قۇرئان قىلىنغاندىن كېيىن، ئۇنىڭ سەنئەت ھاياتى ئەسلىنىپ ئۆتۈلدى. مۇرات ناسىروپنىڭ ھەيكىلىنى ئورنىتىش ھەمدە ئۇنىڭ نامىنى ئالمۇتادىكى بىرەر مەكتەپ ۋە ياكى كوچىغا بېرىش مەسىلىسى ئۆتكەن يىلى 3- ئايدا مەيدانغا چىققان بولۇپ، ئالمۇتادىكى ئۇيغۇر جامائىتىنىڭ تىرىشچانلىقى بىلەن ھازىرچە پەقەت ئۇنىڭ ھەيكىلىنى ئۆزى ۋە دادىسى ياتقان قەبرىستانلىققا ئورنىتىش مۇمكىنچىلىكى بولغان.

مۇرات ناسىروپ ئۆتكەن يىلى 19- يانۋار كۈنى موسكۋادا سىرلىق تۈردە ۋاپات بولغان ئىدى. ئۇنىڭ ئۆلۈمى ھەققىدە تۈرلۈك قىياسلار بار بولۇپ، " ئۆز ئۆيىنىڭ بالكونىدىن ئۆزىنى تاشلاپ ئۆلۈۋالدى" دېگەن يەكۈن چىقىرىلغان بولسىمۇ، لېكىن كۆپىنچە كىشىلەر باشقا ھەر خىل قىياسلارنى ئوتتۇرىغا قويۇشماقتا.(ئۈمىدۋار)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت