Murat nasiropning akisi muratning bashqilar teripidin öltürülgenlikini otturigha qoydi

19 - Yanwar küni moskwadiki öyining balkonidin özini tashlap ölüwaldi dep élan qilin'ghan rusiyining meshhur Uyghur naxsha cholpini murat nasirop heqqide yéngi uchurlar dawamliq tarqitilmaqta. Murat nasiropning ayali, dostliri we uning alumutida yashaydighan a'ile - tawabatliri merhumning özini öltürüwalghanliqini izchil türde inkar qilip keldi. "Twoy dén" (séning küning") namliq intérnét gézitining xewer qilishiche, murat nasiropning akisi nijat nasirop inisining özini öltürüwalghan bolmastin belki, namelum bir küchler teripidin öltürülgenlikini otturigha qoydi.

Xewerge tayan'ghanda, nijat nasiropning éytishiche, rusiye saqchi da'irilirining murat nasiropning ölümi heqqide chiqarghan xulase höjjitidiki "ölümning sewebi" dégen qisimi bosh qaldurulghan bolup, adette, telep boyiche her qandaq bir kishining ölüm sewebi éniq yézilishi kérek iken.

Nijat nasirop, bu höjjettin we muratni islamiy qa'ide boyiche depne qilish aldida yughanda bilin'gen bezi ehwallargha tayinip turup, muratning nasiropning qandaqtur beshinchi qewettin özini yerge étip ölüwalghan bolmastin belki, aldin teyyarlan'ghan pilan boyiche öltürülüp, tashlap qoyulghan bolushi mumkinlikini perez qilidighanliqini eskertken.

Nijat nasiropning "séning küning" namliq gézitke éytishiche, uning inisi murat nasirop téxi yéqindila özining sen'et pa'aliyetlirige igidarchiliq qiliwatqan sen'et - soda shirkiti bilen tüzülgen kélishimni bikar qilip, öz aldigha, musteqil sen'et tijariti we pa'aliyiti bilen shughullinishqa bashlighan.

Bundaq bolghanda, u öz naxsha pilastinklirini özi neshir qilip sétish, naxsha kéchilikini özi uyushturup, kirim qilish qatarliq xususiy jehettiki paydiliq imtiyazlargha érishish mumkin iken.

Murat nasiropning ölümi rusiye sen'et tarixidiki sirliq paji'elik weqelerning biri bolghachqa, taki hazirghiche türlük qiyaslar otturigha qoyulmaqta.(Ümidwar)