Gérmaniyidiki Uyghurlar kishilik hoquq küni munasiwiti bilen namayish qildi

12 - Ayning 10 - küni dunya kishilik hoquq küni munasiwiti bilen, merkizi gérmaniyidiki dunya Uyghur qurultiyi we mezkur teshkilat qarmiqidiki yawropa sherqiy türkistan ittipaqi, gérmaniyining myunxén shehiridiki xitay elchixanisining aldida namayish ötküzdi.

Namayishqa gérmaniyide yashawatqan Uyghurlardin texminen 50 - 60 dek adem ishtirak qilghan. Namayishchilar, xitay hökümitige we xitay hökümitining sherqiy türkistandiki siyasitige qarshi shu'ar towlighan. Namayish jeryanida tasadipiy weqelerning yüz bérishidin saqlinish üchün, gérmaniye da'iriliri neq meydan'gha saqchilarni ewetip tertip saqlighan.

Namayishchilarning xitay konsulxanisi aldidiki naraziliq bildürüsh herikiti töt sa'etlarche dawam qilghan. Shu küni türkiyidiki sherqiy türkistan medeniyet we hemkarliq jem'iyiti enqerediki xitay elchixanisining aldida namayish ötküzgen. Yawropa sherqiy türkistan ittipaqi bir qanche künning aldida, gérmaniye bash ministiri shrédörning xitayni ziyaret qilghanliqi munasiwiti bilen, gérmaniyidiki tibetler, dimokratik xitaylar bilen bérlinda axbarat élan qilish yighini ötküzüp, shrédörni kishilik hoquq mesililiri boyiche xitay bilen söhbet élip bérishqa ündigen idi.

Xitay bash ministiri wén jyabaw, bréyüsélda yawropa ittipaqi bilen qoshma axbarat élan qilip, " ikki terep xelq'ara ehdinamilardiki az sanliq milletler hoquqini öz ichige alghan xelq'ara kishilik hoquq ölchemlirige hörmet qilish kérek, dep qaraydu", dep tekitligen. Shundaqla xitayning "puqralar hoquqi we siyasi hoquq xelq'ara ehdinamisi" ni téz arida maqullaydighanliqini bildürgen. (Erkin)