Qarimay néfit bashqurush idarisining ishchiliri namayish ötküzdi

Gérmaniyidiki sherqiy türkistan uchur merkizining radi'omizgha melum qilishiche, qarimay néfit bashqurush idarisidiki xizmet stazhini sétiwetken ishchilarning 3 - ayning 13 - künidin bashlap élip bériwatqan namayishi hazirghiche dawam qilmaqta iken.

Namayishqa chiqquchilarning% 80 i Uyghur, % 20 i Uyghur élide tughulghan ikkinchi ewlad xitaylar iken. Ular asasliqi xizmet stazhini töwen bahada sétiwetkendin kéyin, nöwette turmush we dawalinish ishlirida qiyiniliwatqanliqi sewebidin namayishqa chiqqan bolup, ular hazir balilirini oqutush we doxturxanida dawalinish qatarliq turmush mesililiride iqtisadiy yétishmesliktek qiyinchiliqlargha duch kelgen.

Namayishqa chiqqan mingdin oshuq ishchilarning sani hazir nechche yüzge chüshüp qalghan bolsimu, lékin ular hazir yenila qarimay néfit bashqurush idarisining partkom ishxanisi aldida dawamliq tinch qarshiliq bildürüp, mezkur orundin xizmetchilerning stazhini sétishigha a'it höjjetlerni körsitishini hemde turmush qiyinchiliqi tüpeylidin hökümetning ularni qayta ishqa orunlashturushini telep qilghan. Biraq qarimay néfit bashqurush idarisining partkom sékritari tang jyen, ishchilar bilen söhbet élip bérishni ret qilghan.

Sherqiy türkistan uchur merkizining bildürishiche yene, qarimaydiki bixeterlik idarisi, bu namayishqa bashchiliq qilghan chün faling isimlik tenterbiye oqutquchisini tutqun qilghan. Nöwette namayishchilar hökümettin bu kishini qoyup bérishni küchlük telep qilmaqta iken. Namayishchilarning mezkur agéntliqqa bildürüshiche, hökümet ularning stazhini sétiwalghanda her yiligha 4 ming yu'endin bergen, emma xitayning daching néfitlikide bolsa ishchilarning stazhini yiligha 10 ming yu'endin sétiwalghan iken. (Peride)