200 Гә йеқин хитай ялланма ишчи үрүмчидә намайиш қилди

200 Гә йеқин хитай ялланма ишчи йеқинда үрүмчи шәһиридики мәлум бир меһманханиниң уларниң маашини вақтида бәрмигәнликигә нарази болуп, кочиға чиқип қаршилиқ билдүргән һәмдә достлуқ йолини тосивелип, қатнашни тохтитип қойған.

Тәңритағ хәвәр ториниң мәлум қилишичә, бу вәқә йүз бәргәндин кейин, үрүмчи шәһәрлик җамаәт хәвпсизлик идариси вә һөкүмәтниң төләм пулини бир тәрәп қилиш ишлириға мәсул ишханисидики хадимлар нәқ мәйданға дәрһал келип, ишчиларға һөкүмәтниң уларниң мәсилисини чоқум яхши бир тәрәп қилип беридиғанлиқини вәдә қилғандин кейин, андин ишчилар йолни бошитишқа қошулған.

Бу ишчилар асаслиқи гуаңдуң вә шәншидин кәлгән болуп, улар үрүмчидики мәлум бир меһманханини қайта ремонт қилип безәш ишлирини қилған. Уларниң мухбирға ейтишичә, мунасивәтлик орун уларға 15‏- април күни беримиз дәп вәдә қилған 3 айлиқ маашини 3 күн кечиктүрүп қойған. Шундақла йәнә бу хизмәтни һөддигә алған оттуридики 2 киши бир қисим пулларни ишчиларниң қолиға йәткүзмәй өзлири еливалған. Шу сәвәбтин бу ишчилар иш ташлап кочида намайиш қилған.

Үрүмчи шәһәрлик һөкүмәтниң төләм пулини бир тәрәп ишлириға мәсул ишханиси, һазир уларниң бу әһвали үстидин җиддий тәкшүрүш елип бериватқанлиқини һәмдә буни яхши бир тәрәп қилишқа тиришидиғанлиқини билдүрди. (Пәридә)