Уйғур аптоном районида бир милйон 600 миң пуқра кийим - кечәк, туралғу вә йеқилғусиз қалди

Уйғур аптоном районлуқ хәлқ ишлар назаритиниң 14 - декабир күни ашкарилишичә, аптоном район бойичә апәткә учриған районларда бир милйон 635 миң пуқра кейим - кечәк, туралғу җай, йотқан көрпә, йимәк ‏- ичмәк вә йеқилғу қатарлиқ һаят қелишқа зөрүр болған асаси турмуш еһтияҗлириниң җиддий һәл қилинишиини күтмәктикән.

Маралбешиниң чоңқорчақ йезисидики пуқралар болупму көмүр вә йемәк - ичмәк билән тәминлинишкә иһтияҗ икәнликини билдүрмәктә.

Аптоном районлуқ хәлқ ишлар назарити чаршәнбә күни өткүзгән ахбарат елан қилиш йиғинида, тәңри теғиниң җәнубий вә шималида " апәткә учриған тәхминән 835 миң амма ашлиққа, 800 миңға йеқин амма кийим - кечәк йотқан - көрпигә, йәнә бир қисим амма туралғулирини қайта қуруш вә йеқилғу мәсилисини һәл қилишқа җиддий иһтияҗлиқ боливатиду " дәп елан қилди.

Хитай мәтбуатлириниң хәвәр қилишичә, даириләр аптоном район бойичә әмәлдарлар вә пуқралар арисида пул вә маддий буюмлар ианә қилиш сәпәрвәрлики елип барған.

Уйғур аптоном райони өткән йилдин бери еғир тәбий апәтләргә учриди. Уйғур аптоном райониниң рәиси исмайил тиливалди илгири бейҗиңда аптоном район бойичә апәт районидики пуқраларниң туралғу җай, йеқилғу вә асаси турмуш еһтияҗлири партийә вә һөкүмәтниң " ғәмхорлуқи" астида һәл қилинғанлиқини җакарлиған. Әмма хәлқ ишлар назарити аптоном район бойичә бир милйон 635 миң пуқраниң бу йил қишни өткүзүш үчүн йимәк - ичмәк, йотқан - көрпә, йеқилғу вә туралғу җай қатарлиқ асасий турмуш буюмлириға еһтияҗ икәнликини билдүрмәктә. (Әркин)