Yéngisar nahiyisi oqutquchi ‏- oqughuchilarni qurban héyt küni yighiwélinip Uyghurlarning qattiq naraziliqini qozghidi

Igilishimizche, yéngisar nahiyisi partkomi we ma'arip idarisi qarar chiqirip, 20 - dékabir qurban héyt küni nahiye tewesidiki 500 din artuq oqutquchi we 5 mingdin artuq ottura- bashlan'ghuch mektep milli oqughuchilirini etigen sa'et 10 din bashlap mekteplerge yighiwalghan hemde etigende xitayning dölet bayriqini chiqirsh murasimi élip bérip ularning héytni xoshal ‏- xoram tebriklesh ishlirigha tosqunluq qilghan.

Melum bolushiche , hökümet tarmaqliri 20- dékabirdiki pa'aliyetke qatanashmighanlarning qattiq jazalinidighanliqi heqqide uqturush qilghan bolup, "pa'aliyetke"nahiye rehberliri, saqchi tarmaqliri we munaswetlik ishchi- xizmetchilerning hemmisi qatnashqan.

Dunya Uyghur qurultiyining bildürüshiche, bu xil yighiwélish nahiye tewesidiki arslanbagh yézisida téximu keng élip bérilghan bolup, yighiwélishqa merkizi mektep we bazarliq bashlan'ghuch mektepler téximu qattiq teshkillen'gen.

Hemme adem xoshal - xoram bayram tentenisi qilidighan mushundaq xoshal künlerde, Uyghurlarning hetta xitayning özining qanunida belgilen'gen dem élish hoquqidinmu behriman bolmighanliqigha nisbeten dunya Uyghur qurultiyi qattiq naraziliq bildürdi.

Dunya Uyghur qurultiyi bayanatchisi dilshat rishit mundaq dédi: "qurban héyt Uyghurlarning en'eniwiy diniy bayrimi bolup , bu héyt atalmish milly térritoriyilik aptonomiye qanunida étirap qilin'ghan we qanuniy jehettin dem élish belgilen'gen bayram küni bolup , xitayning shundaq künde yene ishchi - xizmetchiler we Uyghur oqughuchilarni yighiwélip atalmish wetenperwerlik terbiyisi élip bérishi aldi bilen xitayning özining qanunigha xilap .

U yene, xitayning héyt künini tallap wetenperwerlik terbiyisi élip bérishi birxil sün'iylik bolup, bu Uyghurlarning milly we kishlik hoquqini éghir depsende qilghanliq dep körsetti we dunya Uyghur qurultiyi namidin qattiq eyibleydighanliqini bildürdi. (Jüme)