Үрүмчи билән ләнҗув арисидики хам нефит аққузуш турубисини ятқузуш қурулуши башланди

Уйғур аптоном раюниниң мәркизи үрүмчи билән хитайниң ләнҗув шәһри оттурисидики пишшиқланған вә хам нефит аққузуш турубисини ятқузуш қурулушида рәсми иш башланди . Гәнсулуқ әмәлдарларниң билдүришичә , нефит турубисиниң пишшиқланған нефит аққузуш линийәси үрүмчидин ләнҗувға туташтурилиду . Бу линийә йилиға 10 милйон тонна пишшқланған нефит аққузуш иқтидариға игә . Пичандин башлинидиған хам нефит аққузуш линийәниң йиллиқ нефит ақтуруш иқтидари 20 милйон тонна болуп , қурулушни 2005 - йилниң ахирлириғичә пүттүрип , 2006 - йили рәсми нефит аққузушни пиланға киргүзгән . Хәвәрләрдә, 1550 клометер узунлиқтики нефит туруба йолиға 15 милярт йвән мәбләғ селинидиғанлиқини илгири сүрмәктә .

. Шинхва ахбарат агентлиқиниң бу арида хәвәр қилишичә , хитайниң дөләтлик нефит ширкити қармиқидики шинҗяң нефитлик ширкити , йеқинда җуңғар ойманлиқиниң оттура қисмидин юқири мәһсулатлиқ нефит вә тәбии газ записини байқиған . Шинҗяң нефитлик ширкитиниң баш мудири чен шинфа , йеңидин байқалған тәбии газ вә нефит записи җуңғар ойманлиқиниң мәркизи вә шәрқидики 4 орунда байқалғанлиқини , ойманлиқниң җәнубий қисимида юқири мәһсулатлиқ нефит вә тәбии газ записиниң барлиқи испатланғанлиқини җакалиған . Чен шинфа юқарқий хәвәрни пәйшәнбә күни ” җуңғар ойманлиқидики нефит вә тәбии газ қезиш истиратигийәси “ дигән темидики бир йиғинда ашкарлиған .Хитай тәрәпниң мәлуматида көрситилишичә , җуңғар ойманлиқи 8 милярт 600 милйон тонна нефит записи , 2 трилйон 10 милярт куп метир тәбии газ записиға игә . (Әркин)