Uyghur élidiki 66 néfit quduqi taqiwétilmekchi

Uyghur aptonom rayonining re'isi ismayil tiliwaldi yéqinda ötküzülgen aptonom rayonluq bixeter ishlepchiqirish komitéti yighinigha qatniship, her qaysi derijilik hökümet orunlirining bixeter ishlepchiqirish xizmitige alahide köngül bölüshini telep qildi. Shundaqla yighinda yene, Uyghur élidiki bixeter ishlepchiqirish ölchimige toshmaydighan 66 néfit quduqining yéqinda taqilidighanliqi uqturuldi.

Tengritagh xewer torining melum qilishiche, yighinda mushu yili 1 - aydin 7 - ayghiche bolghan mezgildiki pütün Uyghur élining bixeter ishlepchiqirish weziyiti heqqide doklat bérilip, bu mezgilde her xil sewebler bilen kélip chiqqan kan weqeliri we qatnash hadisilirining, ötken yildikige qarighanda bir qeder köp körülgenliki otturigha qoyulghan.

Bu arida, jilin ölkisimu bu rayondiki bixeterlik ölchimige toshmaydighan 70 nechche kan quduqi taqashni buyruq qildi. Ötken jüme küni jilindiki fénggu'ang kömür kanining 5 - quduqgha su kirip kétip, 16 kishi quduq astida qalghan idi.

Xitayda kan hadisiliri köp yüz béridighan bolup, hökümet da'irilirining melum qilishiche, bu yilning aldinqi yérimidila kan hadisisida ölgen ishchilarning sani 2700 ge yetken. Emma musteqil teshkilatlar, bu sanning toghra emeslikini, chünki kan mes'ulliri jerimanige uchrashtin ensirep, ölgenler sanini qesten az melum qilidighanliqini bildürüp, emeliy sanning buningdin köp jiq ikenlikini körsetmekte. (Peride)