Xitay kucharni eng chong néfit-ximiye sana'et mehsulatlirini toshush bazisi qilmaqchi

Uyghur rayoni xewer torining uchuridin melum bolushiche, xitay da'iriliri kucharni pütün Uyghur diyari boyiche eng chong néfit-ximiye sana'et mehsulatlirini toshush bazisi qilip qurup chiqmaqchi iken.

Xewerde körsitilishiche, xitay da'iriliri yéqindin buyan tarim oymanliqidin néfit we tebi'iy gaz qézishni jiddiyleshtürgen bolsimu, emma néfit mehsulatlirini ichkirige toshush jehette qiyinchiliqqa duch kelgen yeni bu mehsulatlarni hazirqi mewjut tömür yol bilen toshush éhtiyajni qandurulmighan. Mana mushundaq ehwal astida ürümchi tömür yol idarisi shinjang xu'aténg néfit mehsulatlirini toshush shirkiti bilen birliship, 40 milyon yü'endin artuq meblegh sélip, kölimi 75 mo kélidighan mezkur néfit –ximiye mehsulatlirini yighip toshush bazisi qurushni qarar qilghan.

Xitay axbarat wastilirining uchurliridin ashkarilinishiche, bu baza xitayning tarim wadisidin her küni qéziwatqan néfitlirini ichkirige yötkeshni tézlitish hem yötkesh miqdarini ashurushta ünümlük rol oynaydighan. Hazir, Uyghur diyarida xitayning töt chong néfit-ximiye sana'et bazisi ish élip barmaqta. Xitay hökümiti özining néfit we tebi'iy gaz qiyinchiliqini hel qilish üchün bir tereptin ottura asiya bilen bolghan néfit munasiwitini kücheytse, yene bir tereptin Uyghur élida néfit we tebi'iy gaz qézish sür'itini tizletmekte. (Ümidwar)