ئالاتاۋ - ئاتاسۇ نېفىت تۇرۇبا يولىدا پات يېقىندا نېفىت ئېقىتىلىشقا باشلايدۇ


2006-05-09
Share

قازاقىستان بىلەن ئۇيغۇر ئاپتونوم رايونى ئارىسىدا قۇرۇلغان ۋە خىتاينى يىلىغا 10 مىليون توننا نېفىت بىلەن تەمىنلەيدىغان ئالاتاۋ - ئاتاسۇ نېفىت تۇرۇبا يولىدا بۇ ئاينىڭ ئاخىرلىرىدىن باشلاپ رەسمىي نېفىت ئېقىتىلىشقا باشلايدۇ.

"بېيجىڭ ئەتىگەنلىك پوچتا گېزىتى" نىڭ خەۋەر قىلىشىچە، خىتاي بىلەن قازاقىستان مەزكۇر نېفىت تۇرۇبا يولىنىڭ قۇرۇلۇشىغا 806 مىليون دوللار مەبلەغ سالغان بولۇپ، ئۇزۇنلۇقى 1000 كىلومېتىرغا يېتىدىغان نېفىت تۇرۇبىسى ئوتتۇرا قازاقىستاننىڭ قۇمقۇل نېفىتلىكىدىن باشلىنىدۇ.

2005 - يىلى 11 - ئايدا تامانلانغان نېفىت تۇرۇبا قۇرۇلۇشى يىلىغا 20 مىليون توننا نېفىت توشۇش ئىقتىدارىغا ئىگە قىلىپ لايىھىلەنگەن بولسىمۇ، لېكىن ھازىرچە خىتاينى يىلىغا 10 مىليون توننا نېفىت بىلەن تەمىنلەيدۇ. مەزكۇر قۇرۇلۇشقا جۇڭگو نېفىت شىركىتى قازاقترانز نېفىت ۋە قازاقمۇناي گاز شىركىتى قاتارلىق گۇرۇھلار بىرلىشىپ مەبلەغ سالغان.

لېكىن فرانسىيە ئاخبارات ئاگېنتلىقىنىڭ خەۋەر قىلىشىچە، قازاقمۇناي گاز بىلەن قازاقترانز نېفىت شىركىتى " بېيجىڭ ئەتىگەنلىك پوچتا گېزىتى" نىڭ خەۋىرىگە باھا بېرىشنى رەت قىلغان. جۇڭگو نېفىت شىركىتى 2005 - يىلى كانادا ئىگىدارچىلىقىدىكى نېفىت - قازاقىستان شىركىتىنى سېتىۋالدى. بۇ شىركەتنىڭ نېفىتلىكى ئوتتۇرا قازاقىستاندا ئىدى.

قازاقىستان دائىرىلىرى ئاتاسۇ - ئالاتاۋ نېفىت تۇرۇبىسىنىڭ 2011 - يىلغىچە كاسپىي دېڭىز بويىدىكى نېفىتلىككىچە 3000 كىلومېتىرغا ئۇزارتىلىدىغانلىقىنى ۋە نېفىت ئېقىتىش سىغىمىنى بىر ھەسسە ئاشۇرىدىغانلىقىنى بىلدۈرمەكتە. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت