Uyghur élining kündilik xam néfit mehsulat miqdari 70ming tonnidin yuqiri bolghan


2007.03.22

Tengritagh torining 22 - marttiki xewirige qarighanda, shinjang néfit bashqurush idarisining bashliqi tang jyenning ashkarilishiche, Uyghur élining kündilik xam néfit mehsulat miqdari 70ming tonnidin yuqiri bolghan. Shuning bilen birge Uyghur éli xitaydiki xéylongjyang we shendungdin qalsila, künige 70 ming tonna néfit ishlepchiqiralaydighan 3- ölke bolup qalghan.

Bularning ichide, shimaliy jungghar néfitliki we qaramay néfitlikilirimu künige 32 ming tonna, jenubiy tarim néfitliki 16ming 800 tonna, turpan- qumul néfitliki 5ming 700 tonna we xitay néfit-ximiye sana'iti guruhi gherbiy shimal shöbe shirkiti qarmiqidiki néfitlik 13ming tonna bolup, Uyghur élidiki bashqa néfitliklerni qoshqanda jem'iy 70 ming tonna bolghan. Tang jyenning bildürüshiche, hazir Uyghur élining kündilik xam néfit mehsulat miqdari 1953 ‏- yilning bir yilliq mehsulat miqdaridin éship ketken.

Chet'eldiki Uyghur közetkuchilernng bildurushiche, xitay Uyghur élidin 2005 - yili toshup ketken xam néfitning omumiy miqdarini 24 milyon tonna dep ilan qilghan. Eger bu yilliq sür'etni künige 70 ming tonnigha yetküzgen bolsa, bu yilliq xam néfit ishlepchiqirish miqdari texminen 25 milyon tonna etrapida bolidiken.

Xitaylar bergen melumatlargha qarighanda, xitay hökümiti Uyghur élidiki her yilliq xam néfit ishlepchiqirish mehsulat miqdarini 1990 -yilidin béri yilgha 1 milyon tonnidin ashurup kéliwatqan iken. Xitay néfit tarmaqliri teminligen uchurlar gha qarighanda, Uyghur élide hazirghiche bayqalghan néfit zapisi 30 milyard tonna bolup, xitay omumiy néfit zapisining 4 din bir qismini igileydiken.

Del bu xewer ilan qilin'ghan minutlarda, xitay néfit-ximiye sana'iti guruhi gherbiy shimal shöbe shirkiti gherbi tarim tarmaq shirkitining partkom sékritari we intizam tekshürüsh komitétining sékritari jang liming para élish jinayiti bilen qolgha élindi.

Melum bolushiche, u qobul qilghan para 140 ming yü'endin artuq bolup, uninggha 10 yilliq qamaq jazasigha hoküm qilin'ghan.

Dunyaning herqaysi jayliridiki Uyghur ziyaliylirining qarishiche, xitayda künsayin örlewatqan parixorluq qilmishliri intayin kop bolup, jang limingdek paraxor xitaylar Uyghur élide téximu köp iken. (Jüme)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.