Uyghur aptonom rayoni xitayning eng chong néfit bazisi bolup qalidiken

Uyghur aptonom rayonining re'isi ismayil tiliwaldi, Uyghur élining yéqin kelgüside yilda 50 milyon tonna néfit ishlepchiqirip, xitayning sherqiy shimalidiki daching néfitlikidin éship kétidighanliqini shundaqla Uyghur éli xitayning eng chong néfit bazisi bolup qalidighanliqini bildürdi.

"Jonggo géziti" ning xewer qilishiche, ismayil tiliwaldi Uyghur aptonom rayonining yilliq néfit ishlepchiriqish miqdari axirida 100 milyon tonnigha yétidighanliqini tekitligen. Yilliq néfit ishlepchiqirish miqdari 100 milyon tonnigha chiqqanda, Uyghur aptonom rayoni xitay néfit istimalining 60 ٪ ni teminleydighan rayon bolup qalidiken.

Uyghur aptonom rayoni 2004 - yili 22 milyon tonna néfit ishlepchiqarghan bolup, dachingning oxshash waqit ichide ishlepchiqarghan néfiti 4 ٪ töwenligen. Daching 2004 - yili 46 milyon tonna néfit ishlepchiqirilghan idi. Xitaydiki xam néfit zapisining 30 ٪, teb'iy gaz zapisining 34 ٪ Uyghur aptonom rayonigha jaylashqan.

Ismayil tiliwaldining tekitlishiche, da'iriler turpan, qaramay qatarliq jaylarda néfit qédirish meshghulatini tézlitidiken. 2004 - Yili Uyghur aptonom rayoni sana'et igilikining 60 ٪ ni néfit we tebi'iy gaz sana'iti igiligen.

Da'iriler, énérgiye menbe'elirini échish Uyghur aptonom rayonida yerliklerning turmushini yaxshilash rolini oynaydu, dep körsetmekte. Emma merkizi gérmaniyidiki dunya Uyghur qurultiyi bayanatchisi dilshat rishitning tekitlishiche, dölet monopoliyisdiki néfit we tebi'iy gaz bayliqini échish Uyghurlarni menpe'etke ige qilalmaydiken. (Erkin)