Үрүмчи - ләнҗу нефит туруба қурулуши пүтти


2005-10-11
Share

Хитай нефит ширкити вә тәбий газ туруба идарисиниң елан қилишичә, уйғур аптоном райониниң мәркизи үрүмчидин хитайниң ләнҗу шәһиригичә баридиған үрүмчи - ләнҗу нефит туруба қурулуши рәсми пүткән.

Игилишимизчә бу қурулуш қош линийилик туруба қурулуши болуп, бир линийисидә хам нефит, йәнә бир линийидә пишшиқланған нефит еқитилидикән. Нефит турубисиниң ләнҗуғичә баридиған омуми узунлуқи 4000 километир келиду.

Даириләрниң ашкарилишичә, мәзкур қурулушқа 14 милярд 600 милйон йүән мәбләғ селинған. Бу туруба йилиға 20 милйон тонна хам нефит, 10 милйон тонна пишшиқланған нефит еқитиш иқтидариға игә.

Уйғур аптоном райони парткоминиң секритари ваң лечүән, йеқинда аптоном райони хитайниң истратегийилик енергийә запас мәнбәәси болуп қалиду, дәп тәкитлигән.

Бейҗиңда чақирилған компартийә мәркизий комитетиниң бу қетимқи омуми йиғинида хитайниң енергийә истратегийиси музакирә қилинди. Йиғинниң алдида хоңкоңда чиқидиған "вен хуй" гезити, компартийә даирилириниң уйғур аптоном районини хитайниң енергийә бихәтәрлики ролини ойнайдиған район болуп қалиду, дәп атиғанлиқини тилға алған.

Әмма хитайниң бу сияситини тәнқид қилғучилар, даириләрни районниң муһити вә су мәнбәәлирини булғаш, уйғурларни бу тәрәққиятниң сиртида қалдуруш билән әйиблимәктә. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт