Xitay qaramaydin ürümchigiche tutishidighan yéngi tebi'iy gaz turuba yoli yatquzdi

Xitay da'iriliri qaramaydin ürümchigiche tutishidighan yéngi bir tebiy gaz turuba yoli yatquziwatqanliqini élan qildi.

Uyghur aptonum rayonluq néfit shirkiti ishlepchiqirishni emeliyleshtürüsh bashqarmisining bashliqi jyangning bildürüshiche, bu turuba yoli kiler yilining aldinqi yérimida resmiy pütüp ishqa sélinidiken. U, mezkur turuba yolining yilda bir milyard kup métir néfit we tebi'iy gaz toshush iqtidari barliqini bildürüp, uning qazaqistandin sétiwalidighan bir milyon tonna néfitni yötkesh ishlirigha ishlitilidighanliqini körsetti. Énérgiyige qaghjirighan xitay nöwette Uyghur élidiki, shundaqla rusiye we ottura asiyadin import qilidighan néfitlarni Uyghur éli arqiliq xitay ölkilirige toshimaqta. Xitay hökümitining Uyghur élige qaratqan siyasitini tenqid qilghuchilar, bu rayondiki néfit qédirish we toshush ishlirining yerlikning ékélogiyilik muhitini bulghapla qalmay, yerlik xelqni menpe'etlendürmeywatqanliqini bildürmekte. Xitayning yéngidin yasawatqan qaramay- ürümchi turuba yolining omumiy uzunluqi 286 kilométirgha yéqin bolup, 114 kilométirliq böliki déhqanchiliq rayonidin ötidu. Turuba yatquzush jeryanida, nurghun déhqanlar yerliridin ayrilishqa mejbur bolidighan bolup, ulargha qanchilik tölem bérilishi téxi éniq emes.

Xitayda, her xil qurulushlar jeryanida hökümet emeldarlirining parixorliqi sewebidin déhqanlarning menpe'eti ziyan'gha uchrap, her xil qarshiliq heriketler köplep yüz bermekte. (Arzu)