Рабийә қадир нобел мукапатиға намзатлиққа көрситилиши мумкин
2005.01.31
Франсийә ахбарат агентлиқи хәвиригә қариғанда, уйғурларниң асасий кишилик һоқуқ күришиниң символи болған рабийә қадир, 2005 - йиллиқ хәлқара нобел тинчлиқ мукапатиниң намзатлиқиға көрситилиши мумкин икән.
Буниңдин сирт йәнә, инсанпәрвәрлик ярдәм тәшкилати болған "балиларни қутқузуш" тәшкилати, украинийиниң йеңи президенти виктор юшенко вә америкиниң сабиқ ташқи ишлар министири колин повел қатарлиқларму нобел кандидати болиши мумкин.
Рабийә қадир техи өткән йили хәлқара рафто кишилик һоқуқ мукапатиға еришкән болуп, рафто фонди җәмийити 1 - айниң 26 - күни америка пайтәхти вашингтонға келип, мукапатни рабийә қадирниң аилисидикиләргә тапшуруш мурасими өткүзгән иди.
Илгири рафто мукапатиға еришкән берминиң өктичи рәһбири аң сән суки вә демократийә вә кишилик һоқуқ паалийәтчиси иранлиқ ширин ебади қатарлиқ бир қанчә шәхсләр кейин нобел мукапатиғиму еришкән иди.
Рафто фонди җәмийитиниң вәкиллири өткән һәптә әркин асия радиомизни зиярәт қилғанда, уларниң мунасивәтлик орунларниң рабийә қадирни нобел мукапатиға намзатлиққа көрситиши үчүн тиришчанлиқ көрситидиғанлиқини билдүргән иди.
Нобел мукапати швитсийилик алим әлфред нобел (Alfred Nobel) ниң вәсийити билән 1900 - йили қурулған болуп, бу мукапат физика, химийә, физиологийә, медитсина, әдәбият, иқтисад вә тинчлиқ саһәлиридики нәтиҗиләргә берилиду. Шундақла бу мукапатқа еришкүчиләргә бир данә алтун медал, нобел кенишкиси вә 1 милйон 300 миң доллар мукапат берилиду.(Пәридә)
Мунасивәтлик мақалилар
- Рабийә қадир ханимға рафто мукапати бериш мурасими өткүзүлди
- Уйғурлар америка дөләт мәҗлисиниң уйғурларға қаритилған туғут чәклимиси һәққидә қанун чиқиришини тәләп қилди
- Америка хитайниң рабийә қадирни қоюп беришни тәләп қилди
- Рафто фонди җәмийити рәһбәрлири әркин асия радиосини зиярәт қилди
- Рабийә қадир норвигийә кишилик һоқуқ мукапатиға еришти
- Рабийә қадир хәлқаралиқ рафто кишилик һоқуқ мукапатиға еришти