Uyghur aptonom rayonining nopusi 2010‏- yilghiche 22 milyon etrapida kontrol qilinidu

Uyghur aptonom rayoni partkomining mu'awin sékritari nur bekri düshenbe küni Uyghur aptonom rayoni omumi nopusining 2010 - yilghiche 22 milyon etrapida kontrol qilinidighanliqini bildürdi. Emma u bu sanning mushu besh yil ichide ichkiridin Uyghur aptonom rayonigha kélip olturaqlishidighan köchmen nopusini öz ichige alidighan yaki almaydighanliqini tilgha almighan.

U, düshenbe küni échilghan Uyghur aptonom rayonining nopus we pilanliq tughut xizmet yighinida, 11 - besh yilliq pilan ichide nopusning köpiyishini ünümlük kontrol qilish intayin muhim " deydu. "Shinjang géziti" ning eskertishiche, bu besh yil ichide nopus we pilanliq tughut xizmitining nishani yézilargha qaritilidiken. Nur bekri, nurghun yéza ,qishlaqlarda bolupmu namrat rayonlarda tughut sewiyisi yenila yuqiri " dep tekitligen. U, rayonning iqtisadi tereqqiyat istiqbalini nopus mesilisige baghlap, "eger nopus ünümlik türde kontrol qilinmisa, iqtisadi tereqqiyat netijisi yéngi tughulghan nopus teripidin hezim qiliniwétidu " deydu.

Emma nur bekri, 1950 - yillarda 6 % ni igileydighan xitay nopusining hazir 50% din éship ketkenlikini tilgha almighan. Ötkende Uyghur aptonom rayonining mu'awin re'isi jappar hebibulla, pilanliq tughut siyasitining emeliyleshmigenlikini Uyghur qatarliq milletlerning " idiyisi azat bolmighanliqta " dep qarighan.

Emma xitay hökümitining rayonda yolgha qoyghan pilanliq tughut siyasiti kishilik hoquq aktipliri teripidin eyiblenmekte. Uyghur kishilik hoquq we démokratiyi'e herikitining rehbiri rabiye qadir, xitayning siyasitini " irqiy tazilash", dep atighan. "Shinjang géziti" ning eskertishiche, Uyghur aptonom rayonida1995 - yilghiche " pilanliq tughut sherepnamisi" we " yalghuz perzentlik ata - anilar sherepnamisi" alghan a'ililer 820 minggha yetken. (Erkin)