Amérikidiki Uyghurlar noruz bayrimi ötküzdi


2006.03.19

3-Ayning 18-küni amérikining paytexti washin'gton etrapida yashaydighan Uyghur jama'iti we bashqa shitatlar hem döletlerdin kelgen bir qisim Uyghurlar ataqliq Uyghur kishilik hoquq pa'aliyetchisi we xelq'ara Uyghur kishilik hoquq we démokratiye fondi jemiyitining prézidénti rabiye qadir xanimning rehberlikide noruz pa'aliyiti ötküzdi.

Mezkur noruz pa'aliyitige qazaqistanning yerkent shehiridin kelgen "yerkent bulbulliri" namliq Uyghur naxsha-muzika guruppisi qatniship, özlirining yéqimliq naxsha - muzikiliri bilen sorunning keypiyatini yuqiri pellige kötürdi. Shwétsiyidin kelgen naxshichi küresh küsen we sabiq özbékistan döletlik Uyghur ansambilining ataqliq naxshichisi sultan memetop qatarliqlarmu özlirining wekil xaraktérliq ijadiyetlirini tamashibinlargha teqdim qildi.

Wirginiya etrapida yashaydighan Uyghur perzentliridin teshkillen'gen sen'et guruppisi milliy kiyimlirini kiyiship, özliri teyyarlighan sen'et nomurlirini körsetti.

Échilish murasimda söz qilghan rabiye qadir xanim özining xitay türmisidin chiqqanliqigha neq bir yol toshqan kün'ge toghra kelgen mezkur noruz bayrimida qérindashliri bilen shat-xoram halda bir yerge jem bolghanliqidin xushalliq hés qilidighanliqini, lékin xitay türmiside yene minglighan Uyghur perzentlirining gunahsiz azap chékiwatqanliqi, ittipaqliqni kücheytip, Uyghurlarning hoquqlirini, erkinlikini qolgha keltürüsh üchün birlikte küresh qilish lazimliqini tekitlidi.

14-Mart küni xelq'ara Uyghur kishilik hoquq we démokratiye fondi jem'iyiti amérika dölet mejlisining kishilik hoquq guruppisi bilen birlikte dölet mejliside Uyghur medeniyet küni ötküzgen idi. Murasimda söz qilghan dölet mejlis ezasi we kishilik hoquq guruppisining re'isi tom lantosning Uyghurlarning toluq musteqilliqi we erkinlikini qollaydighanliqi heqqidiki sözliri Uyghurlargha zor ümid we xushalliq élip kelgen bolup, bu qétimqi noruz Uyghurlar üchün ene shundaq xushalliq héssiyatlar bexsh étilgen künlerge toghra kelgen idi. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.