Нур бәкри бейҗиңда "үч хил күчләр қош тиллиқ маарип сияситигә һуҗум қилмақта" дәп көрсәтти


2008-03-04
Share

Шинхуа ториниң 4 - март хәвиридә көрситишичә, хитай коммунист һөкүмитиниң уйғур аптоном райониға қойған өлкә рәиси сүпитидә, бейҗиңда өткүзүлүшкә башлиған хитай 11 - нөвәт сиясий мәслиһәтчиләр кеңишигә қатнишиватқан нур бәкри, сәйшәнбә күни шинхуа агентлиқи мухбириниң соаллириға җаваб бериш җәрянида, қош тиллиқ маарип сияситини алаһидә тилға алған.

Нур бәкри " қош тиллиқ маарип сиясити, уйғур аптоном районлуқ һөкүмәтниң қоллиниватқан бир хил маарип сиясити, әмма чәтәлләрдики үч хил күчләр, буни һөкүмитимизгә һуҗум қилишниң васитиси қилип, җуңго һөкүмитини аз санлиқ милләтләрни хитайчә сөзләшкә қиставатиду дәп көрсәтмәктә" дегән.

У йәнә тәкитләп, қош тиллиқ маарипида асаслиниватқини йәнила аз санлиқ милләт тиллири, хәнзу тилиму башқа тил йезиқ билән охшашла муһим, мениң қош тил маарипиға қарши чиқиватқан бөлгүнчиләрдин сорап баққум бар," әгәр қош тиллиқ маарипидин гуманлинишқа тоғра кәлсә чәтәлләргә чиқип чәтәл тили вә йезиқини өгиниватқанларни немә дәп чүшиниш керәк " дегән.

Уйғурлар шундақла чәтәлләрдики уйғур зиялийлири һәмдә паалийәтчиләр болса хитай һөкүмитиниң қош тиллиқ маарипи әмәлийәттә хитай тилини асас қиливатқан бир тиллиқ һәмдә мәҗбурий қоллиниватқан маарип сиясити икәнликини, чәтәлләрдә қоллиниватқан өз ана тилиға һөрмәт қилинған әркин һалдики қош тил маарип сияситидин түптин пәрқлинидиған ассимилятсийә сиясити икәнликини оттуриға қоймақта.

Нур бәкриниң үч хил күчләр, қош тиллиқ маарип сияситигә һуҗум қилмақта дегән баянлириға инкас қайтурған дуня уйғур қурултийи баянатчиси дилшат ришит бүгүн радиомизға баянат берип " хитай йетиштүргән дәл нур бәкридәк бир қисим кадирлар хитай билән һәмкарлишип уйғур маарипини йоқитип, уйғурларни тил вә мәдәнийәт җәһәттин ассимилятсийә қилиш қәдимини тезлаштурмақта " деди.

Нур бәкри йеқинқи йиллардин буян, хитай һөкүмитиниң уйғурларға қоллиниватқан қош тиллиқ маарип сияситиниң әмәлийлишишидә актип һәм муһим әмәл тутуп келиватқан уйғур кадирниң бири болуп, у илгириму қош тиллиқ маарипни изчил һәм күчәйтип йүргүзүш һәққидә мәхсус сөз қилип " туңганларниңму тили йоқ, милләт болуп туруватмамду, хитай тилини яхши өзләштүрүш, аз санлиқ милләт маарип сүпитини юқири көтүриду" дегәндәк сөзлири билән уйғурларниң ғәзипини қозғиған иди. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт