Нур бәкри, " үч хил күчләр" гә қарши көрүшниң техиму күчәйтилидиғанлиқини җакарлиди


2008.03.08

Уйғур аптоном районлуқ һөкүмитиниң рәиси нур бәкри, уйғур елидә аталмиш үч хил күчләргә қарши елип бериливатқан көрүшни техиму күчәйтидиғанлиқини билдүргән.

Франсийә агентлиқиниң бейҗиңдин хәвәр қилишичә, хитай хәлқ қурултийиниң йиллиқ йиғиниға қатнишиватқан нур бәкри, шәнбә күни бейҗиңда мухбирларға бәргән баянатида, бөлгүнчилик, террорчилиқ вә радикал диний күчләр шинҗаң үчүн әң чоң тәһдит дәп көрсәткән. У баянатида " биз шинҗаңниң тәрәққияти вә муқимлиқини бузидиған һәрикәтләрни вақтида бастуруш үчүн, давамлиқ сәзгүр болушимиз керәк" дегән.

Бу арида нур бәкри билән бирликтә хитай хәлқ қурултийиниң йиллиқ йиғиниға қатнишиватқан вәкилләрниң бери болған, шинҗаң қораллиқ сақчи қисимлириниң сиясий комиссари, хав шиячин, хитай күндилик гезитигә бәргән баянатида, шинҗаңда террорлуққа қарши елип бериливатқан күрәшниң, пүтүн хитай дөлитиниң муқимлиқи үчүн алаһидә әһмийити бар дәп, көрсәткән.

Хав шиячинниң ейтишичә, террорлуқ паалийәтлиридә, шәрқий түркистан исламий һәрикити, шинҗаң үчүн әң җиддий тәһдит һесаблинидикән.

Франсийә агентлиқи хәвиридә, 1930‏ - йили вә‏ 1944 йили икки қетим, шинҗаңда мустәқил шәрқий түркистан дөлитини қурған уйғурларниң, һелиму өз мустәқил дөлитини қуруш арзусини йоқатмиғанлиқини тәкитлигән.

Бу арида шәнбә күни хитай хәлқ қурултийиниң йиллиқ йиғиниға қатнишиватқан, уйғур елидин кәлгән вәкилләр билән учрашқан, хитай дөләт рәиси хуҗинтав, уйғур ели һөкүмәт әрбаблири вә хәлқини шинҗаңниң муқимлиқи, тәрәққиятини күчләндүрүш вә хәлқни бай қилиш чегра райониниң турақлиқини сақлаш үчүн, ғәрбий районни тәрәққий қилдуруш истратегийиси оттуриға қойған имканийәтләрдин пайдилинишқа чақирди. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.