Nur bekri, " üch xil küchler" ge qarshi körüshning téximu kücheytilidighanliqini jakarlidi


2008.03.08
Share on WhatsApp
Share on WhatsApp

Uyghur aptonom rayonluq hökümitining re'isi nur bekri, Uyghur élide atalmish üch xil küchlerge qarshi élip bériliwatqan körüshni téximu kücheytidighanliqini bildürgen.

Fransiye agéntliqining béyjingdin xewer qilishiche, xitay xelq qurultiyining yilliq yighinigha qatnishiwatqan nur bekri, shenbe küni béyjingda muxbirlargha bergen bayanatida, bölgünchilik, térrorchiliq we radikal diniy küchler shinjang üchün eng chong tehdit dep körsetken. U bayanatida " biz shinjangning tereqqiyati we muqimliqini buzidighan heriketlerni waqtida basturush üchün, dawamliq sezgür bolushimiz kérek" dégen.

Bu arida nur bekri bilen birlikte xitay xelq qurultiyining yilliq yighinigha qatnishiwatqan wekillerning béri bolghan, shinjang qoralliq saqchi qisimlirining siyasiy komissari, xaw shiyachin, xitay kündilik gézitige bergen bayanatida, shinjangda térrorluqqa qarshi élip bériliwatqan küreshning, pütün xitay dölitining muqimliqi üchün alahide ehmiyiti bar dep, körsetken.

Xaw shiyachinning éytishiche, térrorluq pa'aliyetliride, sherqiy türkistan islamiy herikiti, shinjang üchün eng jiddiy tehdit hésablinidiken.

Fransiye agéntliqi xewiride, 1930‏ - yili we‏ 1944 yili ikki qétim, shinjangda musteqil sherqiy türkistan dölitini qurghan Uyghurlarning, hélimu öz musteqil dölitini qurush arzusini yoqatmighanliqini tekitligen.

Bu arida shenbe küni xitay xelq qurultiyining yilliq yighinigha qatnishiwatqan, Uyghur élidin kelgen wekiller bilen uchrashqan, xitay dölet re'isi xujintaw, Uyghur éli hökümet erbabliri we xelqini shinjangning muqimliqi, tereqqiyatini küchlendürüsh we xelqni bay qilish chégra rayonining turaqliqini saqlash üchün, gherbiy rayonni tereqqiy qildurush istratégiyisi otturigha qoyghan imkaniyetlerdin paydilinishqa chaqirdi. (Ömer qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet