Нур бәкри: "шинҗаңниң муқимлиқини күздә тутуп, шинҗаңни чәтәлләргә тәшвиқ қилишни күчәйтиш керәк"

Уйғур аптонум районлуқ һөкүмәт тор бетидин ашкалинишиға қариғанда, үрүмчидә җүмә күни ечилған "аптонум районниң партком тәшвиқат хизмити" йиғинида, уйғур аптонум райони партком муавин секретари нур бәкри "тәшвиқатни күчәйтип, шинҗаңниң муқимлиқини қоғдаштики муһим хизмәт. Муқимлиқ һәмдә тәрәққиятни күздә тутқанда чоқум шинҗаңни чәтәәләргә тәшвиқ қилиш ишлирини күчәйтиш керәк" дегән.

Хитай парткоминиң уйғур елигә қойған әмәлдари ваң лечуән илгири, "чегра сиртидики бөлгүнчи күчләрниң сиңип киришиниң алдини елиш үчүн, өзимизниң ахбарат вастилиридин пайдилнип уйғур ели ичигә һәмдә сиртқа болған тәшвиқат хизмитимизни күчәйтишимиз керәк " дәп оттурға қойғандин кейин, аптонум районлуқ партком тәшвиқат органлири һәр хил қошна дөләт вә башқа чәтәлләр билән мәдәнийәт сәнәт кечиликлири, мәдәнийәт алмаштуруш паалийәтлирини өткүзүш арқилиқ, уйғур елиниң тинич, хәлқниң болса иттипақ, баравәр, баяшат дәп тәшвиқ қилип келиватқан болсиму әмма йәнила чәтәл мухбирлириниң уйғур елидә зиярәттә болушини қаттиқ чәкләп кәлмәктә.

2005 - Йили һәр бир идарә орган һәтта ширкәт карғаниларғиму ташқи тәшвиқат ишханиси намида мәхсус органларни қуруп уйғур елиниң һәқиқий әһвалиниң хәлқараға ашкарлинишини қаттиқ конторл қилмақта.

Америка хәлқара диний әркинлик комитети хадимлириниң -2005 йили -8 айда уйғур елидики диний әркинликни тәкшүрүш паалийитиму йәрлик партийә һөкүмәт тәшвиқат органлириниң конторуллиқида қаттиқ назарәт астида елип берилған иди. (Гүлчеһрә)