Нур бәкри: “дөләтниң пүтүнликини көз қарчиғимдәк асраймән”


2008.01.25

22 ‏-январ ахирлашқан уйғур аптоном районлуқ 11 ‏-нөвәтлик хәлқ қурултийиниң 1 ‏- омумйиғинида рәис нур бәкри һоқуқ тапшурувелиш нутқи сөзлигән. У нутқида алди билән , өзигә ғәмхорлуқ қилип, бу вәзипигә өстүргән хитай комунист партийисигә рәһмәт ейтқан. У буниңдин кейин “ үч хил күчләр ” гә һәм чегра ичи-сиртидики болгүнчиләргә қаттиқ зәрбә бериштә чиң туридиғанлиқи, дөләт бихәтәрликини җенини қоғдиғандәк қоғдайдиғанлиқини, дөләтниң пүтүнлүкини болса, өзиниң көз қарчиғини асриғандәк асрайдиғанлиқини билдүргән. Нур бәкриниң мәзкур нутқи үстидә тохталған муһаҗирәттики уйғур зиялийлири, уйғур елидики қорчақ рәисләр тарихида йеңи бир сәһипә ечилғанлиқини билдүрүшмәктә.

Төвәндә мухбиримиз шөһрәт һошурниң нур бәкриниң мәзкур нутқи һәққидә бир қисим уйғур зиялийлири билән өткүзгән сөһбитини аңлайсиләр:

Дуня уйғур қурултийиниң муавин рәиси муһәммәд тохти әпәнди нур бәкриниң миллий кимлики вә вәкиллик салаһийити һәққидә тохталди.

Нур бәкри нутқида, иқтисади қурулуш вә хәлқ турмуши һәққидә көп тохталмиған. Баштин ахир, дөләт бихәтәрлики вә муқимлиқини чөридәп сөз қилған. У сөзидә, һәр вақит чоң вәзийәтни асасий орунға қоюп, дөләт ичи ‏- сиртидики миллий бөлгүнчиләргә қаттиқ зәрбә бириштә чиң туридиғанлиқини алаһидә әскәрткән.

Муһәммәд тохти әпәнди йәнә нур бәкриниң чоң вәзийәт дегән сөзиниң маһийәттә, чоң мәнпәәти йәни хитай хәлқиниң мәнпәәти икәнликини билдүрди.

Канадада яшаватқан уйғур зиялийлиридин туйғунҗан абдувәли әпәнди, нур бәкриниң һоқуқ тапшурувелиш нутқиниң хошамәт нутқи икәнлигини, нур бәкриниң нутқини хәлққә хитабән әмәс, хитай комунистик партийисигә хитабән сөзлигәнликини деди.

Голландийидә яшаватқан адаләт ханим, нур бәкриниң нутқи һәққидики қарашлирини билдүрди.

юқириқи үч мулаһизичи, нур бәкриниң нутқини, “вәтән-милләтни сетиш қәсәмнамиси” дәп қарайдиғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.