"Ш у а р" рәисиниң рабийә қадир ханим һәққидики баяни дуня мәтбуатлирида хәвәр қилинди

 Роейтерс агентлиқи җүмә күнки хәвиридә, нур бәкриниң америка башчилиқидики ғәрб әллирини хитайниң тәрәққиятидин биарам болған "дүшмән күчләр" дәп атиғанлиқини, бейҗиңниң уйғур илидики һөкүмранлиқиға нарази гуруһларни демократийә вә кишилик һоқуқ намида қоллаватиду, дәп һуҗум қилғанлиқини вә ғәрб әллирини дөләт ичи вә сиртидики 3 хил күчләрниң йөләнчүки һәм хоҗайини, дәп елан қилғанлиқини билдүргән.

Тәйвәнниң мәркизи ахбарат агентлиқи нур бәкриниң рабийә қадир ханим вә дуня уйғур қурултийини 4‏ -, 10 ‏ - вә 12 ‏ - авғусттики һуҗумларниң пәрдә арқисидики һәқиқий җавабкари, дәп елан қилғанлиқини хәвәр қилди. Нур бәкри кадирлар йиғинида сөзлигән нутуқида рабийә қадир ханимни түрлүк сияси хитаплар билән әйибләпла қалмай, шәхсийитигә һуҗум қилидиған нурғун ибариләрни қолланған.

Хоңкоңдики "да гоңбав" гезити җүмә күнки санида нур бәкриниң нутуқини хәвәр қилип, нурниң дуня уйғур қурултийи рәиси рабийә қадир ханимға шиддәтлик һуҗум қилғанлиқини язди. Лекин нур бәкриниң рабийә қадир ханим тоғрисидики һуҗумлириға орун берип, нурниң америка вә ғәрб әллирини " дүшмән күчләр" дәп тәнқид қилғанлиқини тилға алмиди.

 Рабийә қадир ханим радиомизға бәргән баянатида нур бәкриниң тәнқидлирини рәт қилип, нур бәкриниң " сиясий әхлақниң әқәлли чәк - чегрисидин һалқип кәткән сөз ‏ - һәрикити, униң сапасини намайән қилиштин башқиға яримайду " дәп көрсәтти.