Хитайдин қечип кәлгән кичик пәрһат аниси билән тепишти

Нөвәттә уйғур балилирини хитай өлкилиридә оғрилиқ қилишқа охшаш җинайи ишларға ишлитиш вәқәлири интайин көп болуп, йеқинда хитайға оғурлинип кетилгән 11 яшлиқ пәрһат үрүмчигә қечип кәлгән.

Тәңритағ тори 14 ‏- июн күни, бу йил 4 ‏- айниң 12 ‏- күни йәкән наһийисидин хитайниң нәнҗин шәһиригә елип қечилған пәрһат һәққидә хәвәр елан қилди. Хәвәрдә ейтилишичә, аран 11 яшқа киргән пәрһат адәм қачақлири тәрипидин һушсизландурулғандин кейин, нәнҗингә елип келингән вә оғрилиқ қилишқа мәҗбурланған. У күнигә 2000 йүән оғрилаш вәзиписини орунлиялмиғанлиқи үчүн хоҗайинлири уни қаттиқ урған . Пәрһат хоҗайинға тамака әкилиш баһанисида, пойиз истансисиға берип үрүмчигә қечип кәлгән.

Пәрһат үрүмчидә нәқ бир айдин кейин аниси билән тепишқан. Хитай өлкилиридә тиҗарәт қиливатқан уйғурларниң истансимизға йәткүзгән инкаслиридин мәлум болушичә, уйғур балилирини оғрилиқ қилиштәк җинайи ишларға селиш арқилиқ пул тепиватқанлар, ялғуз хитайлар болупла қалмастин, бәлки уларниң арисида уйғурларму хели көп салмақни игиләйдикән шуниңдәк пәрһатқа охшаш қечип кәлгән балилар наһайити аз санда болуп, хитай өлкилиридин қайтип келәлмәйватқан уйғур балилириниң сани хелила көп икән.

Чәтәлләрдә уйғурларниң кишилик һоқуқи үчүн паалийәт елип бериватқан уйғур тәшкилатлири, хитай һөкүмитиниң хитай өлкилиридә җинайәт ишләшкә мәҗбурлиниватқан уйғур балилирини қутулдурушқа қилчә әһмийәт бәрмәйватқанлиқини билдүрмәктә. (Әқидә)