Уйғур елидә олимпик мәшилини йәрлик партийә секритари көтәрмәкчи


2007.06.29
Share on WhatsApp
Share on WhatsApp

Уйғур аптоном райониниң маралбеши наһийиси чоңқорчақ йезисиниң йезилиқ партийә ячейка секритари давут һашим, 2008 - йили бейҗиңда өткүзүлидиған олимпик мусабиқисиниң мәшили уйғур аптоном районидин өткәндә мәшәлни көтәргүчи намзатлар тизимликигә киргүзүлгән.

Йәрлик партийә секритариниң мәшәлни көтәргүчи намзатлар тизимликигә киргүзүлгәнлики райондики хитай тор бәтлиридә бир қәдәр иҗабий баһаға еришкән болсиму, лекин уйғур тор бәтлиридә бу мәсилә талаш ‏- тартиш қозғиди.

Давут һашим 2003 - йили 2- айниң 24 - күни маралбеши наһийисидә йүз бәргән вә хитай даирилириниң статистикиси буйичә 170 нәччә адәмниң өлүшигә сәвәбчи болған йәр тәврәш апитидә нами чиққан шәхсләрниң бири болуп, униң аилисидики 5 җан киши шу қетимқи йәр тәврәш апитидә өлгән. Хитай һөкүмити уни аилә тавабатидин айрилип қелиштәк еғир күнләрдә, партийиниң йәр тәврәш районидики сияситини қәти тәврәнмәй иҗра қилған шәхс, дәп махтиған вә хитай баш министири вен җябав қобул қилған иди.

Уйғурчә тор бәтләрдә бир қисим тордашлар йәрлик партийә секритариниң олимпик мәшилини көтүрүши олимпик роһиға таза тоғра кәлмәйдиғанлиқини язса, йәнә бәзи кишиләр олимпик мәшили көтәргүчи ким болса мәйли, лекин уйғур болғанлиқидин пәхирлинидиғанлиқини йезишмақта. Намзатлар тизимликигә киргүзүлгәнлики давут һашимниң чоқум олимпик мәшили көтиридиғанлиқидин дерәк бәрмисиму, лекин бу мәсилигә қизиққучилар, уйғур тәнтәрбийичиләрни намзатлар тизимликигә киргүзүш олимпик роһиға техиму уйғун келиду, дәп қарашмақта. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.