Xitay hökümiti 50 tin artuq Uyghurgha ölüm jazasi berdi

Xitay hökümiti térrorchiliqqa qarshi turush bahanisida 50 tin artuq Uyghurgha ölüm jazasi berdi. Xitay hökümitining Uyghur élige qoyghan partkom sékrétari wang léchüen bu yilning ichide élip bérilghan térorchiliqqa qarshi heriket jeryanidila 50 tin artuq Uyghurgha ölüm jazasi bérilgenlikini bildürdi.

Roytirs axbarat agéntliqining ürümchidin bergen xewirige qarighanda, wang léchüen düshenbe küni chet'el muxbirlirining ziyaritini qobul qilip, "biz gerche térrorchiliqqa zerbe bérishte mana mushuninggha oxshash qattiq wasitilerni qollan'ghan bolsaqmu, xelq'ara térrorchi küchlirining bu yerde küchiyiwatqanliqini köriwatimiz. Hökümitimiz ulargha zerbe bérishtin qet'iy bash tartmaydu we térrorchiliqqa qarshi bu köreshni uzun bir mezgil dawam étidu" dégen.

Chet'eldiki kishilik hoquq teshkilatliri xitay hökümitining 11 - séntebir weqesidin kiyin, xelq'ara térrorluqqa qarshi küreshtin paydilinip, tinchliq bilen öz köz qarishini otturigha qoyghan Uyghurlarni basturiwatqanliqini tenqid qilghan idi. Xelq'ara kechürüm teshkilati bu yil 7 - ayda élan qilghan doklatida, xitay hökümitining térorchiliqqa zerbe bérish bahanisida nechche minglighan Uyghurlarni qanunsiz tutqun qilghanliqini bildürgen.

Roytirs agéntliqining bildürüshiche, wang léchüen düshenbe küni buni ret qilghan. U yene Uyghur élide héchqandaq milliy we érqiy mesililerning yoqliqini tekitlep, "milliy bölgünchilerning köp qismi Uyghurlar. Emma ularning xahishi Uyghurlargha wekillik qilmaydu" dégen. Biraq chet'eldiki Uyghur pa'aliyetchiliri wang léchüenning yuqiriqi sözini ret qilmaqta. (Arzu) munasiwetlik maqalilar wang léchü'en chet'el muxbirlirigha sherqiy türkistan heqqide sözlidi