Wang léchüen, yéqinda bir Uyghur pa'aliyetchisining étip öltürülgenlikini bildürdi

Uyghur aptonom rayonining partkom sékritari wang léchüen axbarat élan qilish yighinida, düshenbe küni yene bir Uyghur pa'aliyetchisining xitay saqchi da'iriliri teripidin étip öltürülgenlikini étirap qildi.

Wangning bildürüshiche, abdulla qurban isimlik bu kishi aqsudiki Uyghur élining musteqilliqini terghip qilidighan bir teshkilatning bashliqi bolup, u 2000 - yili 8 - ayning 7 - küni kucharda,özini tutqili kelgen saqchilar bilen toqunushup qélip, jama'et xewpsizlik idarisining xitay bashliqi chéng pinni étip öltürgen.

Wang yene, abdulla qurbanning u qétimliq toqunushta qéchip qutulghanliqini, emma uning bashqa hemrahlirining saqchilar teripidin étip öltürülgenlikini bildürdi. Uning éytishiche, shundin buyan abdulla qurbanni tutush buyruqi chiqirilghan bolup, bu yil 7 - ayning 18 - küni uning téxiche aqsuda ikenliki pash bolghan. Netijide saqchilar 8 - ayning 22 - küni u turushluq jaygha basturup kirgen.

Wang léchüen sözide yene, abdulla qurbanning saqchilar teripidin bayqalghandin kéyin, özining qol astidiki ikki kishini étip öltürüp, andin saqchilargha qarap oq chiqarghanliqini, shu sewebtin saqchilarning axiri uni étip öltürgenlikini bildürdi.

Emma dunya Uyghur qurultiyining bayanatchisi dilshat rishit, abdulla qurbanning peqet özini qoghdighan bolushi mumkinlikini eskertti. Saqchilar buningdin sirt yene, yéqinda abdulla qurbanning egeshküchiliridin 10 kishini qolgha alghan.

Wang léchüen yighinda yene, xitay da'irilirining hazir aptonom rayon qurulghanliqining 50 yilliqining aldida pütün Uyghur éli boyiche, "3 xil küch" ke zerbe bérish herikitini qattiq yürgüziwatqanliqini bildürdi. (Peride)