Xitay sot mehkimisi bir Uyghurni muddetsiz qamaq jazasigha höküm qildi

Ürümchi sheherlik ottura xelq sot mehkimisi buningdin üch ay ilgiri mexpiy sot échip, 2002 - yili 8 - ayda pakistan da'iriliri teripidin xitaygha qayturup bérilgen pakistanda yashawatqan qeshqerlik muhemmed toxtini muddetsiz qamaq jazasigha höküm qilghan.

Muhemmed toxti uzun yillardin béri pakistanda yashawatqan Uyghur muhajirlarning biri idi. Emma aptonom rayonluq dölet bixeterlik idarisi 2002 - yili 8 - ayda pakistan ichki bixeterlik idarisining ruxsiti bilen pakistan'gha mexpiy saqchilarni ewetip, muhemmed toxtini rawalpindida qolgha alghandin kéyin ürümchige élip ketken.

Muhemmed toxti qolgha élinishtin ilgiri b d t pakistandiki musapirlar ishxanisidin siyasi panahliq tiligen bolup, musapirlar ishxanisi uninggha siyasi panahliq bergen we shwétsiye teripidin qobul qilin'ghan idi. U shwétsiyige qarap uchushtin bir qanche kün ilgiri qolgha élindi.

Merkizi gérmaniyidiki dunya Uyghur qurultiyining melumatigha qarighanda, ürümchi sheherlik ottura xelq sot mehkimisi üch ayning aldida muhemmed toxtigha höküm élan qilip, muddetsiz qamaq jazasigha höküm qilghan. Emma sot mehkimisining muhemmet toxtini qandaq jinayetler bilen eyibligenliki hazirghiche melum emesken. (Erkin)