Америка уйғур бирләшмиси баянат елан қилип, хитай һөкүмитиниң уйғурларни өлүмгә һөкүм қилғанлиқини әйиблиди


2007-11-12
Share

9 - Ноябир хитай һөкүмәт ахбарат тармақлири, 25 - декабир делосида қолға елинған 17 нәпәр уйғур ичидин абдувәли имин қатарлиқ 6 нәпәр уйғур яшқа " дөләтни парчилаш мәқситигә йетиш үчүн, 2005 ‏- йили 8 ‏- айдин 2007 ‏- йили 1 ‏- айғичә, диний паалийәтләр билән актип шуғулланған һәмдә ғазат тәрғибати елип барған вә террорлуқ мәшиқ базиси қуруп ислам хәлипә дөлити қуруш үчүн тәйярлиқ қилған" дәп әйибләп өлүм вә муддәтсиз қамақ җазаси берилгәнликини хәвәр қилған болуп, алдинқи күни дуня уйғур қурултийи вә америка уйғур бирләшмиси баянат елан қилип, хитайниң мәзкур қилмишини қаттиқ әйиблиди.

Дуня уйғур қурултийи баянатчиси дилшат ришит, хитайниң бу бир бөләк уйғурларни қәтли қилишидики асасий мәқситиниң болса, уйғур миллий мустәқиллиқ күрәшчилириниң һәйвисини сундуруш үчүн мәқсәтлик елип берилған бастуруш икәнликини билдүрди вә хитайниң бу мәқсәтлири әмәлгә ашмайду дәп көрсәтти.

Дилшат ришит йәнә, мәзкур уйғурларниң җазаға тартилишиниң, хитайда йәнә охшаш болмиған көз қараштикиләрниң изчил бастурулуп келиватқанлиқиниң дәлили болуп, келәр йиллиқ олимпиктин бурун хитайда бундақ әһвалларда яхшилиниш болидиғанлиқиға ишәнмәйдиғанлиқини қошумчә қилди.

Шуниңға яндашқан һалда, 12 ‏- ноябир америка уйғур бирләшмисиму бир баянат елан қилип, хитай һөкүмитиниң мәзкур уйғурларни өлүмгә һөкүм қилғанлиқини әйибләйдиғанлиқини билдүрди.

Америка уйғур бирләшмисиниң баш катипи алим сиейитофниң билдүрүшичә, мәзкур уйғурлар устидин ечилған сот интайин йепиқ һаләттә болған болуп, уларни өлүмгә буйрушта йетәрлик пакит көрситилмигән.

У йәнә, хитай һөкүмитиниң 11 ‏- сентәбир вәқәсидин кийин, хитайға қаршилиқ көрсәткән һәрқандақ бир уйғурни террорчилиқ”җинайити билән әйибләп өлүмгә һөкүм қилип кәлгәнликини, бу нөвәтлик сотта мәзкур уйғур яшларға артилған җинайәтләргиму ишәнмәйдиғанлиқини билдүрүп : " униңдин башқа бу сот адаләтсиз һалда йепиқ елип берилған болуп, мәзкур 6 уйғур яшниң кишилик һоқуқи хәлқаралиқ өлчәм буйичә капаләткә игә қилинмиди"деди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт