Amérika Uyghur birleshmisi bayanat élan qilip, xitay hökümitining Uyghurlarni ölümge höküm qilghanliqini eyiblidi

9 - Noyabir xitay hökümet axbarat tarmaqliri, 25 - dékabir délosida qolgha élin'ghan 17 neper Uyghur ichidin abduweli imin qatarliq 6 neper Uyghur yashqa " döletni parchilash meqsitige yétish üchün, 2005 ‏- yili 8 ‏- aydin 2007 ‏- yili 1 ‏- ayghiche, diniy pa'aliyetler bilen aktip shughullan'ghan hemde ghazat terghibati élip barghan we térrorluq meshiq bazisi qurup islam xelipe döliti qurush üchün teyyarliq qilghan" dep eyiblep ölüm we muddetsiz qamaq jazasi bérilgenlikini xewer qilghan bolup, aldinqi küni dunya Uyghur qurultiyi we amérika Uyghur birleshmisi bayanat élan qilip, xitayning mezkur qilmishini qattiq eyiblidi.

Dunya Uyghur qurultiyi bayanatchisi dilshat rishit, xitayning bu bir bölek Uyghurlarni qetli qilishidiki asasiy meqsitining bolsa, Uyghur milliy musteqilliq küreshchilirining heywisini sundurush üchün meqsetlik élip bérilghan basturush ikenlikini bildürdi we xitayning bu meqsetliri emelge ashmaydu dep körsetti.

Dilshat rishit yene, mezkur Uyghurlarning jazagha tartilishining, xitayda yene oxshash bolmighan köz qarashtikilerning izchil basturulup kéliwatqanliqining delili bolup, kéler yilliq olimpiktin burun xitayda bundaq ehwallarda yaxshilinish bolidighanliqigha ishenmeydighanliqini qoshumche qildi.

Shuninggha yandashqan halda, 12 ‏- noyabir amérika Uyghur birleshmisimu bir bayanat élan qilip, xitay hökümitining mezkur Uyghurlarni ölümge höküm qilghanliqini eyibleydighanliqini bildürdi.

Amérika Uyghur birleshmisining bash katipi alim siéyitofning bildürüshiche, mezkur Uyghurlar ustidin échilghan sot intayin yépiq halette bolghan bolup, ularni ölümge buyrushta yéterlik pakit körsitilmigen.

U yene, xitay hökümitining 11 ‏- séntebir weqesidin kiyin, xitaygha qarshiliq körsetken herqandaq bir Uyghurni térrorchiliq”jinayiti bilen eyiblep ölümge höküm qilip kelgenlikini, bu nöwetlik sotta mezkur Uyghur yashlargha artilghan jinayetlergimu ishenmeydighanliqini bildürüp : " uningdin bashqa bu sot adaletsiz halda yépiq élip bérilghan bolup, mezkur 6 Uyghur yashning kishilik hoquqi xelq'araliq ölchem buyiche kapaletke ige qilinmidi"dédi. (Jüme)