Uyghur élide oqush yardem qerz puligha érishkenler sani intayin cheklik bolmaqta
2005.10.05
Uyghur aptonom rayonluq ma'arip nazaritining charshenbe küni élan qilghan melumatliridin ashkarilinishiche, Uyghur élide bu yil oqush yardem qerz puli alghanlarning sani aran 426 neper bolup, bu dölet chüshürüp bergen sanning aran 4٪ ini igileydu.
Buning aldidila, xitay döletlik ma'arip ministirliqi Uyghur élide oqush yardem qerz puli bérish xizmitining ijra qilinish ehwalining yaxshi emeslikini bildürüp, Uyghur aptonom rayonluq ma'arip da'irilirini tilgha élip tenqid qilghan idi.
Melumatlargha qarighanda, xitay döletlik ma'arip ministirliqining oqush yardem puli bérish siyasiti boyiche, soda - sana'et bankisi, yéza igilik bankisi qatarliqlarning Uyghur élidiki tarmaq bankiliri bu yil Uyghur élidiki 10200 aliy mektep oqughuchisigha oqush yardem qerz puli bérishni pilanlighan. Emma 15 - séntebirge qeder her qaysi bankilar 1700 oqughuchining iltimasini testiqlighan bolup, buning ichide heqiqiy qerz pulini alalighanlar aran 426 neper bolghan.
Xitayda oqush pulining téz ösüshi we oqush chiqimlirining shexsning zimmisige yötkilishi, nurghun namrat oqughuchilarni aliy mekteplerde oqushtin mehrum qilmaqta. Xitay hökümiti namrat oqughuchilargha oqush yardem qerz puli béridighanliqini bildürgen bolsimu, biraq nurghun oqughuchilar, oqush yardem qerz puli élish resmiyetlirining murekkepliki we qiyinliqini shikayet qilmaqta. (Arzu)