Хитай һөкүмити шаир нурмәмәт ясинни қолға алғанлиқини етирап қилди


2005-01-13
Share

Қәшқәр шәһәрлик җамаәт хәвпсизлик идарисиниң хадими пәйшәнбә күни радиомиз мухбириниң зияритини қубул қилип, язғучи вә шаир нурмәмәт ясинниң қолға елинғанлиқини етирап қилди.

Буниң алдида, германийидики шәрқий түркистан учур мәркизи, қәшқәр маралбешилиқ нурмәмәт ясинниң қош айлиқ жорнал "қәшқәр әдәбияти" ниң бәшинчи саниға "көк кәптәр" намлиқ әсәрни елан қилғанлиқи сәвәбидин қолға елинғанлиқини билдүргән иди.

Қәшқәр шәһәрлик җамаәт хәвпсизлик идариси сиясий башқармисиниң мәзкур хадими, нурмәмәт ясинниң дилосиниң нөвәттә уйғур аптонум районлуқ алий сот мәһкимисигә сунулғанлиқини, өзиниң болса маралбеши наһийилик җ х идарисиниң тутуп туруш орниға қамалғанлиқини билдүрди.

Мухбиримизниң игилишичә, хитай даирилири " бөлгүнчилик" идийини тәрғип қилған дәп қариған " көп кәптәр" намлиқ әсәрниң қисқичә мәзмуни мундақ икән:

Тозаққа чүшүп, қәпәзгә соланған көк кәптәр өлүп кәтсиму қуллуқта яшимаслиқ ирадисини билдүрүш үчүн, тилини чишләп үзүвапту. Берилгән суни ичмәй, данни йимәй, зәһәрлик бөлдүргәнни йәп өливапту. Униң ата- бовилириму мушундақ ирадә билән тәғдиргә қаршилиқ билдүргән икән.

Қәшқәрдики сақчи даирилири вә мәдәнийәт органлири, нурмәмәт турсунниң " көк кәптәр" намлиқ әсири бесилған "қәшқәр әдәбияти" ниң 5 - санидин һазирғичә җәмий икки миң парчидин артуқ йиғивалған. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт