Xitay hökümiti yazghuchi nurmuhemmet yasinni 10 yilliq qamaq jazasigha höküm qildi

Xitayning Uyghur aptonom rayonidiki bir sot mehkimisi yéqinda yazghuchi nurmuhemmet yasin üstidin höküm élan qilip, yazghuchini 10 yilliq qamaq jazasigha höküm qilghan. Nurmuhemmet yasin ötken yili 11 - ayda qolgha élin'ghan bolup, teptish mehkimisi uni "qeshqer edebiyati" da milliy bölgünchilikni terghip qilidighan eser élan qilish bilen eyibligen.

Nurmuhemmet yasin maralbésh nahiyisining awat bazirida bir déhqan a'iliside tughulghan idi. U qolgha élin'ghandin kéyin maralbéshidiki bir türmige solan'ghan. Maralbéshidiki ismini ashkarilashni xalimaydighan, weziyettin xewerdar erbaplarning bildürüshiche, nurmuhemmet yasinning soti maralbéshi nahiyiside échilghan. Biraq, hökümni qaysi sot mehkimisining chiqarghanliqi, maralbéshi nahiyilik sot yaki qeshqer wilayetlik ottura sotning höküm chiqarghanliqi hazirche melum bolmidi.

Amma sot 2 - ayning 2 - küni échilghan. Maralbéshi nahiyilik saqchi idarisidiki saqchilar nurmuhemmet yasinning soti toghrisida melumat bérishtin özini qachurdi. Nurmuhemmetning dilosigha edebiyat sen'etchiler birleshmisi shundaqla qeshqer wilayetlik partkom teshwiqat bölümi ariliship, "qeshqer edebiyati" zhornilidiki tehrirlerni sürüshtürgen.

Nurmuhemmet yasinning teptish da'iriliri teripidin milliy bölgünchilikni terghip qilish bilen eyiplen'gen " kök kepter" namliq esiri "qeshqer edebiyati" ning 2004 - yilliq 5 - sanida élan qilin'ghan idi. Qeshqer wilayetlik saqchi idarisi, teshwiqat bölümi we mediniyet idarisi "qeshqer edebiyati" ning 5 - sanini yighiwalghan. (Erkin)