Хитай һөкүмити шаир нурмуһәммәт ясинни маралбешидин үрүмчигә йөткәп кәткән


2005-06-03
Share

Хитай сот мәһкимиси, "қәшқәр әдәбияти" да елан қилған бир парчә әдәбий әсири сәвәбидин 10 йиллиқ қамақ җазасиға һөкүм қилған шаир вә язғучи нурмуһәммәт ясин, йеқинда маралбешидики түрмидин үрүмчигә йөткәп кеткән.

Қәшқәрдики җамаәт хәвпсизлик даирилириниң ашкарилишичә, нурмуһәммәт ясин 5 - айниң 19 - күни маралбешидики түрмидин үрүмчидики аптоном районлуқ 1 - түрмигә йөткиветилгән. Нурмуһәммәт ясин, өткән йили 10 - айда "қәшқәр әдәбияти" ниң 2004 - йиллиқ 4 - саниға " ява кәптәр" намлиқ нәсри әсирини елан қилғандин кейин, қәшқәр вилайәтлик җамаәт хәвпсизлик даирилири тәрипидин қолға елинған. Маралбеши наһийилик сот мәһкимиси, бу йил 2 - айда язғучини хитай җинайи ишлар қануниниң 249 - маддиси бойичә кишиләрни миллий бөлгүнчиликкә күшкүртүш билән әйибләп, 10 йиллиқ қамақ җазасиға һөкүм қилған.

Қәшқәр вилайәтлик оттура сот мәһкимиси язғучиниң етиразини рәт қилип, 3 - айда әслидики һөкүмни күчкә игә, дәп җакарлиған иди. Қәшқәрдики вәқәдин хәвәрдар әрбапларниң ашкарилишичә, қәшқәр вилайәтлик оттура сот мәһкимиси язғучиниң етиразини көрүп чиққандин кейин, әслидики һөкүмни 7 йилға чүшүрмәкчи болған. Әмма қәшқәр вилайәтлик парткомниң секритари ши дагуаң нурмуһәммәтниң җаза муддитини қисқартишқа қарши чиқип, сотчиларға бесим ишләткән.

Нурмуһәммәт ясинниң дилоси хәлқара кишилик һоқуқ органлириниң тәнқидигә учриған. Кишилик һоқуқ тәшкилатлири хитай һөкүмитини терроризмға қарши турушни баһанә қилип, уйғурларниң кишилик һоқуқини дәпсәндә қилиш билән әйиблимәктә иди.(Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт