Xitay hökümiti sha'ir nurmuhemmet yasinni maralbéshidin ürümchige yötkep ketken

Xitay sot mehkimisi, "qeshqer edebiyati" da élan qilghan bir parche edebiy esiri sewebidin 10 yilliq qamaq jazasigha höküm qilghan sha'ir we yazghuchi nurmuhemmet yasin, yéqinda maralbéshidiki türmidin ürümchige yötkep kétken.

Qeshqerdiki jama'et xewpsizlik da'irilirining ashkarilishiche, nurmuhemmet yasin 5 - ayning 19 - küni maralbéshidiki türmidin ürümchidiki aptonom rayonluq 1 - türmige yötkiwétilgen. Nurmuhemmet yasin, ötken yili 10 - ayda "qeshqer edebiyati" ning 2004 - yilliq 4 - sanigha " yawa kepter" namliq nesri esirini élan qilghandin kéyin, qeshqer wilayetlik jama'et xewpsizlik da'iriliri teripidin qolgha élin'ghan. Maralbéshi nahiyilik sot mehkimisi, bu yil 2 - ayda yazghuchini xitay jinayi ishlar qanunining 249 - maddisi boyiche kishilerni milliy bölgünchilikke küshkürtüsh bilen eyiblep, 10 yilliq qamaq jazasigha höküm qilghan.

Qeshqer wilayetlik ottura sot mehkimisi yazghuchining étirazini ret qilip, 3 - ayda eslidiki hökümni küchke ige, dep jakarlighan idi. Qeshqerdiki weqedin xewerdar erbaplarning ashkarilishiche, qeshqer wilayetlik ottura sot mehkimisi yazghuchining étirazini körüp chiqqandin kéyin, eslidiki hökümni 7 yilgha chüshürmekchi bolghan. Emma qeshqer wilayetlik partkomning sékritari shi dagu'ang nurmuhemmetning jaza mudditini qisqartishqa qarshi chiqip, sotchilargha bésim ishletken.

Nurmuhemmet yasinning dilosi xelq'ara kishilik hoquq organlirining tenqidige uchrighan. Kishilik hoquq teshkilatliri xitay hökümitini térrorizmgha qarshi turushni bahane qilip, Uyghurlarning kishilik hoquqini depsende qilish bilen eyiblimekte idi.(Erkin)