Уйғур балилирини хитай өлкилиригә алдап апарған бир гуруппа кишиләр тутулди

Мәхсос уйғур балилирини хитайниң ичкири өлкилиригә алдап апирип, оғрилиққа салидиған бир гуруппа кишиләр йеқинда гүйҗу өлкисиниң гүйяң шәһиридә тутулди.

Гүйяң сақчи даирилириниң билдүришичә, улар йеқинда оғрилиқ қиливатқан 13 яшлардики бир уйғур балини тутувалған болуп, кийин ениқлаш арқилиқ, бу балиниң турғун нияз исимлик бир киши тәрипидин гүйяңға алдап елип келинип оғрилиққа селинғанлиқи мәлум болған. Буниң билән турғун нияз исимлик бу киши билән бирликтә туриватқан 17 киши бирла вақитта қолға елинған.

Хитай даирилириниң мәлуматлириға қариғанда, тутулғанларниң сәккизи әр, төти аял йәнә бәши қорамиға йәтмигән балилар болуп, бу балиларниң һәммиси турғун нияз тәрипидин гүйяңға алдап елип килингәнләр икән. Турғун нияз бу балиларға һәр күни 300 йүәнлик пул вә мал оғрилашни вәзипә қилған икән.

Нөвәттә бу кишиләр уйғур аптунум раюнлуқ сақчи даирилиригә өткүзүп берилгән. Гүйяң сақчи даирилиридин игилишимизчә, уйғур балилирини алдап апирип, оғрилиққа селиштәк җинайи қилмишлар хитайниң һәр қайси өлкилиридә барғансири көпәймәктә. (Арзу)