Һәр 4 йилда уйғур елидики ява өсүмлүкләрниң бир хили йоқалмақта

Уйғур елидә һазир һәр 4 йилда бир хил қиммәтлик ява өсүмлүк йоқиливатқан болуп, буниңға асаслиқи қалаймиқан боз йәр ечиш, чарвиларни һәддидин зиядә яйлитиш вә саяһәтчилик қатарлиқлар сәвәб болмақта.

Шинҗаң йеза-игилик пәнләр акадимийисиниң бу һәқтики мәлуматида, гәрчә уйғур елидә ява өсүмлүк вә явайи һайванларниң нәсли қуруш әһвали бир қәдәр көрүнәрлик болсиму, лекин бу әһвалниң йеқинқи бир нәччә йил ичидә тез сүрәттә еғирлишиватқанлиқи көрситилгән.

Гәрчә мәлуматта явайи өсүмлүкләрниң йоқилишиға аит конкрет санлиқ мәлуматлар берилмигән болсиму, лекин бир қанчә йиллар авалқи доригәрликтики қиммити юқири болған нурғун өсүмлүкләрниң һазир из-дерикини тапқили болмайдиғанлиқи, шундақла мушу сүрәт буйичә мөлчәрлигәндә, кәлгүсидә һәр 4 йилда бир хил ява өсүмлүкниң йоқилип маңидиғанлиқи көрситилгән.

Йеза-игилик пәнләр акадимийисиниң доклатиға қариғанда, адәмләр кәлтүрүп чиқарған зиянкәшликләр ява өсүмлүкләрниң йоқилишиға сәвәб болған асаслиқ амиллар икән. Болупму нурғун тәбиий мәнзирилик җайларниң саяһәтчиликкә ечиветилиши вә һәр қайси җайлардин кәлгән боз йәр ачқучиларниң муһит қоғдаш бәлгилимилиригә хилап һалда қалаймиқан йәр ечиши бу районниң екологийилик тәңпуңлиқиға тәсир көрсәтмәктә. (Пәридә)