Her 4 yilda Uyghur élidiki yawa ösümlüklerning bir xili yoqalmaqta

Uyghur élide hazir her 4 yilda bir xil qimmetlik yawa ösümlük yoqiliwatqan bolup, buninggha asasliqi qalaymiqan boz yer échish, charwilarni heddidin ziyade yaylitish we sayahetchilik qatarliqlar seweb bolmaqta.

Shinjang yéza-igilik penler akadimiyisining bu heqtiki melumatida, gerche Uyghur élide yawa ösümlük we yawayi haywanlarning nesli qurush ehwali bir qeder körünerlik bolsimu, lékin bu ehwalning yéqinqi bir nechche yil ichide téz sür'ette éghirlishiwatqanliqi körsitilgen.

Gerche melumatta yawayi ösümlüklerning yoqilishigha a'it konkrét sanliq melumatlar bérilmigen bolsimu, lékin bir qanche yillar awalqi dorigerliktiki qimmiti yuqiri bolghan nurghun ösümlüklerning hazir iz-dérikini tapqili bolmaydighanliqi, shundaqla mushu sür'et buyiche mölcherligende, kelgüside her 4 yilda bir xil yawa ösümlükning yoqilip mangidighanliqi körsitilgen.

Yéza-igilik penler akadimiyisining doklatigha qarighanda, ademler keltürüp chiqarghan ziyankeshlikler yawa ösümlüklerning yoqilishigha seweb bolghan asasliq amillar iken. Bolupmu nurghun tebi'iy menzirilik jaylarning sayahetchilikke échiwétilishi we her qaysi jaylardin kelgen boz yer achquchilarning muhit qoghdash belgilimilirige xilap halda qalaymiqan yer échishi bu rayonning ékologiyilik tengpungliqigha tesir körsetmekte. (Peride)