Sanji oblastliq ottura sotining erziyetchilerdin qalaymiqan heq élish qilmishi ashkarilandi

Uyghur aptonom rayoni sanji tun'gan aptonom oblastliq ottura soti yigirme nechche yildin buyan, xitay aliy sotining xelq ishliri heq telep qanuni buyiche erz qilghuchilardin heq élish belgilimisidiki ölchemdin artuq hem qalaymiqan hem köp türler buyiche heq élip kelgen.

Sanji ottura sotining xitay qanunigha xilap halda qalaymiqan heq élishigha hetta Uyghur aptonom rayonluq aliy sotimu köz yumup kelgen.

Boshun torining bu heqte 23 - séntebir bergen xeweridin ashkarilinishiche, sanji ottura soti dewagerlerdin köprek heq élish üchün bir erzni bir qanche tarmaqlargha bölüp délo békitip béjirish, her bir délogha ayrim heq élish usullirini qollinip, adette heq élinmaydighan qanuniy resmiyetlergimu heq békitip, hetta on yüenni artuq élish meqsitide hemme pakitlar toluq bolghan délo üstidinmu sot achmay hem sotni qesten kéchiktürüsh arqiliq puqralarning qanuniy heq-hoqoqlirigha éghir dexli teruz qilghandin bashqa , bu xil qanunsiz usullar arqiliq, jawabkarliqi sürüshtürülüshke tégishlik qanun'gha xilap qilmishlargha yochuq hazirlap bergen hem xitay edliye sistémisigha éghir qalaymiqanchiliq élip kelgen.

Xitayda barliq sot organlarning arxipxanilirigha dölet arxipxanisi qatarida mu'amile qilinidu, shundaqla erzdarlardin arxip saqlash heqqi élinmaydu, emma sanji ottura soti mexsus arxip saqlash heqqinimu békitken.

Boshun torining ashkarilishiche, sanji ottura sotida ish pursitige érishkenler köpinchisi yerlik kadirlarning begzadiliri bolup, ularning köpinchisining resmiy qanun kespini oqup püttürgenlik guwahnamilirimu toluq emes bolup, her yili edliye émtihanliridin ötelmey yüridiken. Yene bir tereptin bu sotta xizmet qilghan konilar bolsa hayankeshlikni kesip qiliwalghan bolup, alghan paydisigha qarap, délo üstidin pakitsiz halda öz aldigha höküm élan qilip, xelqning qanuniy menpe'etini qoghdaydighan orunni xuddi qarar jem'iyetke oxshitip qoyghan.( Gülchéhre)