Өзбекистан даирилири гүәнтанамодики уйғурлар мәсилисидә америкини әйиблиди


2006.05.22
Share on WhatsApp
Share on WhatsApp

Өзбекистан пайтәхти ташкәнттики шаңхәй һәмкарлиқ тәшкилати террорлуққа қарши туруш мәркизиниң башлиқи дүшәнбә күни америка билән албанийини гүәнтанамодики уйғурларни хитайға қайтуруп бериш мәсилисидә қош өлчәм қолланди, дәп әйиблиди.

Террорлуққа қарши туруш мәркизиниң башлиқи вячеслав қасимов, "бир тәрәплимилик қарар чиқарғанда вә қош өлчәм қолланғанда биз бу қарарниң қобул қиларлиқ тәрипи барлиқидин гуманлинимиз " дәйду. У, бирләшмә ахбарат агентлиқиға " америка билән албанийини җуңго даирилириниң террорчилиққа қарши туруш тәлипигә әмәлий һәрикити билән җавап беришкә чақиримиз " деди.

Хитай билән русийә башчилиқида қурулған шаңхәй гуруһиниң террорчилиққа қарши туруш мәркизи ташкәнт шәһиридә болуп, өзбекистан өткән йили 5 - айда әнҗандики исянни бастурғандин кейин хитай билән иттипақлишиш йолини тутмақта.

Америка йеқинда гүәнтанамодин қоюп бәргән 5 нәпәр уйғурни албанийә һөкүмити қобул қилип, уларни теранадики бир йиғивелиш мәркизидә тутуп турмақта иди. Бу хитай даирилириниң наразилиқини қозғиған вә хитай ташқий ишларминистирлиқи америка билән албанийини әйиблигән. Көзәткүчиләр, өзбекистан әмәлдари вячеслав қасимовниң сөзлирини әнҗан вәқәсидин кейин хәлқарада йитим қалған ташкәнт һөкүмитиниң хитайға яхшичақ болуш хуйхалиқи, дәп баһа бәрмәктә.

Өзбекистан һөкүмити бу йил 3 - айда канада тәвәликидики бир уйғурни өзбекистанға туққан йоқлап барғанда тутуп қалған вә канада һөкүмитиниң бу уйғурни қоюп бериш тәлипини рәт қилған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.