Özbékistan da'iriliri güentanamodiki Uyghurlar mesiliside amérikini eyiblidi

Özbékistan paytexti tashkenttiki shangxey hemkarliq teshkilati térrorluqqa qarshi turush merkizining bashliqi düshenbe küni amérika bilen albaniyini güentanamodiki Uyghurlarni xitaygha qayturup bérish mesiliside qosh ölchem qollandi, dep eyiblidi.

Térrorluqqa qarshi turush merkizining bashliqi wyachéslaw qasimow, "bir tereplimilik qarar chiqarghanda we qosh ölchem qollan'ghanda biz bu qararning qobul qilarliq teripi barliqidin gumanlinimiz " deydu. U, birleshme axbarat agéntliqigha " amérika bilen albaniyini junggo da'irilirining térrorchiliqqa qarshi turush telipige emeliy herikiti bilen jawap bérishke chaqirimiz " dédi.

Xitay bilen rusiye bashchiliqida qurulghan shangxey guruhining térrorchiliqqa qarshi turush merkizi tashkent shehiride bolup, özbékistan ötken yili 5 - ayda enjandiki isyanni basturghandin kéyin xitay bilen ittipaqlishish yolini tutmaqta.

Amérika yéqinda güentanamodin qoyup bergen 5 neper Uyghurni albaniye hökümiti qobul qilip, ularni téranadiki bir yighiwélish merkizide tutup turmaqta idi. Bu xitay da'irilirining naraziliqini qozghighan we xitay tashqiy ishlarministirliqi amérika bilen albaniyini eyibligen. Közetküchiler, özbékistan emeldari wyachéslaw qasimowning sözlirini enjan weqesidin kéyin xelq'arada yitim qalghan tashkent hökümitining xitaygha yaxshichaq bolush xuyxaliqi, dep baha bermekte.

Özbékistan hökümiti bu yil 3 - ayda kanada tewelikidiki bir Uyghurni özbékistan'gha tuqqan yoqlap barghanda tutup qalghan we kanada hökümitining bu Uyghurni qoyup bérish telipini ret qilghan. (Erkin)