Özbékistan hökümiti kanada puqrasi Uyghur hüseyin jélilni qolgha aldi

Özbékistan hökümiti kanada puqrasi Uyghur hüseyin jélilni 26‏- mart küni tashkenttin tutup ketken. Uning bilen birge özbékistan'gha kelgen ayali we 3 balisi hazir tashkenttiki tuqqanlirining öyide turmaqta iken. Hüseyin jélilning aghinisi séyit aydoghan kanada agéntliqigha, ularning hazir özbékistan hökümitining hüseyin jélilni xitaygha tapshurup bérishidin endishe qiliwatqanliqini bildürgen.

Aydoghan sözide, " özbékistan uni xitaygha tapshurup béridighandek turidu. Eger shundaq bolsa, xitay hökümiti uni, burunqi siyasiy pa'aliyetliri üchün gep ‏-söz yoq étip tashlaydu" dep bildürgen. Lékin u özbékistanning hüseyin jélilni xitaygha tapshurush xewirini qandaq alghanliqini éytimighan. Shundaqla tashkenttiki xadimlarmu hazirghiche bu heqte inkas qayturushni ret qilghan.

Hüseyin jélil ilgiri Uyghur élidiki chéghida Uyghurlarning kishilik hoquqi üchün küresh qilghanliqi sewebidin xitay hökümiti teripidin tutqun qilin'ghan we éghir qiyin-qistaqlargha élin'ghan. Kéyin u bir amallar bilen özbékistan'gha qéchip chiqip, türkiye arqiliq 2002‏- yili kanadagha kélip siyasiy panahliq tiligen. Hemde u téxi 3-4 ayning aldida kanada puqraliqigha ötken.

Kanada tashqi ishlar ministirliqining bayanatchisi kim girtél xanim seyshenbe küni bir neper kanada puqrasining heqiqeten özbékistanda qolgha élin'ghanliqini étirap qildi, emma mexpiyetlik belgilimiliri boyiche, uning shexsiy salahiyitini hazirche ashkarilimaydighanliqini bildürdi. U yene, ularning hazir bu kishining yéqin-tuqqanliri bilen alaqilishp, ulargha yardem bériwatqanliqini éytti.

Özbékistan prézidénti islam kerimofning xitay bilen bolghan munasiwiti xélidin béri yéqin. Bolupmu xitay hökümiti kerimofning ötken yilidiki endijan weqesini basturushini qollighandin kéyin, u derhalla amérikidin yüzini örüp, rusiye we xitay bilen alahide qoyuq munasiwet ornatqan. (Peride)