Uyghur élidiki 100 mingdek oqughuchilar paxta térishqa orunlashturuldi

Uyghur élidiki aliy, ottura - bashlan'ghuch mekteplerdin bolup jem'iy 100 mingdek oqughuchi 1 - öktebirdin burun paxta térish emgikige orunlashturuldi.

Ürümchi kechlik gézitining xewiridin ashkarilinishiche, paxta térish emgikini mektepler orunlashturidighan bolup, bashlan'ghuch üchünchi yilliqtin yuqiri yilliqta oquydighan oqughuchilar birdek etraptiki paxta bazilirida emgek qilidu.

Uyghur aptunum rayunluq ma'arip nazaritining belgilimisi boyiche, bashlan'ghuch mektep oqughuchiliri bir hepte toluqsiz we toluq ottura mektep oqughuchiliri ikki hepte etraptiki paxta bazilirida paxta térish emgikige qatnishidu. Emma xewerde aliy mektep oqughuchilirining qanche uzaq paxta tériydighanliqi körsitilmigen.

Hazir paxta térishning jiddiy mezgili bolup, Uyghur élidiki xitayning ishlepchiqirish qurulush bingtü'eni we yerlikler jiddiy adem küchige muhtaj. Emma xitay hökümet da'irilirining bashlan'ghuch mektep oqughuchiliridin tartip mejburiy emgekke orunlashturushini tenqid qilghuchilar, japaliq paxta térish emgikining oqughuchilarni terbiyilesh emes, belki ularning saghlam ösüp yitilishige tesir yitishidin endishe qilmaqta. (Arzu)