Ismayil tiliwaldi sherqiy türkistan mesiliside pakistan da'irilirige rehmet éytti

Yéqinda hindistan bilen pakistanni ziyaret qilghan Uyghur aptonom rayonining re'isi ismayil tiliwaldi pakistanda muxbirlarni kütüwélish yighini ötküzüp, xitay hökümitining Uyghurlarni basturush yolidiki herikitige yardem bergen pakistan da'irilirige rehmet éytqan. Ismayil tiliwaldining hindistan bilen pakistandiki ziyariti 16 - öktebirde axirlashqan. Ismayil tiliwaldi islamabadtiki muxbilarlarni kütüwélish yighinida, " pakistan uzundin béri sherqiy türkistan térorliq küchlirige zerbe bérish jehette biz bilen aktip hemkarlashti, bu muna'iswet bilen biz chongqur minnetdarliqimizni bildürimiz" dep tekitligen. Ismayil tiliwaldining jenubiy asiyadiki ziyariti bolupmu uning hindistandiki ziyariti xelqara jem'iyetning diqqitini qozghighan. Bu Uyghur aptonom rayoni rehbirining yéqinqi 50 yil ichide élip barghan hindistandiki tunji ziyaritidur.

Uning hindistan da'iriliri bilen élip barghan söhbiti hindistan bilen Uyghur ili arisida hawa yollirini échish, néfit sahesidiki hemkarliq türlirige chétilghan. Xitay metbu'atliri ismayil tiliwaldining jenubiy asiyadiki ziyaritini uning ziyaritidin bir hepte kéyin xewer qildi. Ismayil tiliwaldi pakistanda bash ministir shawket eziz, pakistan kéngesh palata re'isi muhemmed miyanlar bilen söhbet élip barghan. U, pakistan da'irilirini sherqiy türkistan küchlirige qarshi xitay hökümiti bilen téximu zich hemkarlishishqa ündigen. Ismayil tiliwaldi 1996 - yili xoten namayishni basturush jeryanidiki radikal ipadiliri bilen Uyghur aptonom rayonining re'islikige qoyulghan. Xelqara kechürüm teshkilati xitay hökümitini térorchiliqqa qarshi turushni bahane qilip, Uyghurlarning kishilik hoquqini depsede qilmaqta, dep eyipligen. (Erkin)