Майтағдики партлаш вәқәсини бир хитай ишчисиниң садир қилғанлиқи ашкариланди


2005.01.24

Уйғур аптонум районлуқ җамаәт хәвпсизлик назарити өткән һәптә майтағда йүз бәргән минибустики партлаш вәқәсини бир хитай көмүр кан ишчисиниң садир қилғанлиқини билдүрди. Вәқәдә 11 адәм өлгән, йәттә адәм яриланған иди.

Хитай һөкүмитигә қарашлиқ тәңритағ тор бетиниң билдүрүшичә, вәқәни садир қилған бәй чиңхуа исимлик хитайму мәзкур партлашта өлгән. Хитай даирилири униң илгири шихудики бир қетимлиқ кан вәқәсидә яриланғандин кийин, кан даирилириниң бәргән 20 миң йүән төләм пулидин нарази болуп, кичик аптубусни партлатқанлиқини билдүрди. Әмма хәвәрдә бу хитайниң немә үчүн мәзкур минибусни нишан қилғанлиқи һәққидә һечқандақ мәлумат берилмигән.

Өткән пәйшәнбә күни майтағ билән шиху оттурисидики юқири сүрәтлик ташйолни туташтуридиған бир көврүктин өтиватқан кичик аптобус партлиғандин кейин, хитай даирилири дәрһалла вәқәниң шәрқий түркистан "террорчилири" тәрипидин елип берилғанлиқ иһтималлиқини йоққа чиқармайдиғанлиқини билдүргән иди. Әмма, вәқәни бир хитайниң садир қилғанлиқи паш болғандин кийин, хитай даирилири бигунаһ кишиләрниң өлүшигә сәвәб болған бу хитайни "террорчи" дәп атимиди.

Хитай даирилири майтағдики аптобус партлаш вәқәсидә өлгәнләрниң салаһийитини техи ашкарилимиған. Җамаәт хәвпсизлик даирилири илгири, вәқәдә өлгәнләрниң ичидә бир хитай билән бир қазақниң салаһийити иниқланғанлиқини билдүрүп, қалғанлирини тилға алмиған иди. Әмма әнгилийә б б с радио- телевизийиси, партлашта өлгәнләрниң мутләқ көп қисминиң уйғурлар болуши мумкинликини илгири сүргән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.