Maytaghdiki partlash weqesini bir xitay ishchisining sadir qilghanliqi ashkarilandi

Uyghur aptonum rayonluq jama'et xewpsizlik nazariti ötken hepte maytaghda yüz bergen minibustiki partlash weqesini bir xitay kömür kan ishchisining sadir qilghanliqini bildürdi. Weqede 11 adem ölgen, yette adem yarilan'ghan idi.

Xitay hökümitige qarashliq tengritagh tor bétining bildürüshiche, weqeni sadir qilghan bey chingxu'a isimlik xitaymu mezkur partlashta ölgen. Xitay da'iriliri uning ilgiri shixudiki bir qétimliq kan weqeside yarilan'ghandin kiyin, kan da'irilirining bergen 20 ming yü'en tölem pulidin narazi bolup, kichik aptubusni partlatqanliqini bildürdi. Emma xewerde bu xitayning néme üchün mezkur minibusni nishan qilghanliqi heqqide héchqandaq melumat bérilmigen.

Ötken peyshenbe küni maytagh bilen shixu otturisidiki yuqiri sür'etlik tashyolni tutashturidighan bir köwrüktin ötiwatqan kichik aptobus partlighandin kéyin, xitay da'iriliri derhalla weqening sherqiy türkistan "térrorchiliri" teripidin élip bérilghanliq ihtimalliqini yoqqa chiqarmaydighanliqini bildürgen idi. Emma, weqeni bir xitayning sadir qilghanliqi pash bolghandin kiyin, xitay da'iriliri bigunah kishilerning ölüshige seweb bolghan bu xitayni "térrorchi" dep atimidi.

Xitay da'iriliri maytaghdiki aptobus partlash weqeside ölgenlerning salahiyitini téxi ashkarilimighan. Jama'et xewpsizlik da'iriliri ilgiri, weqede ölgenlerning ichide bir xitay bilen bir qazaqning salahiyiti iniqlan'ghanliqini bildürüp, qalghanlirini tilgha almighan idi. Emma en'giliye b b s radi'o- téléwiziyisi, partlashta ölgenlerning mutleq köp qismining Uyghurlar bolushi mumkinlikini ilgiri sürgen. (Arzu)