Ürümchidiki xongyenchi éléktir istansisida partlash weqesi yüz berdi

Uyghur aptonom rayonining merkizi ürümchidiki xongyenchi 2 - éléktir istansisining may ponkitida, jüme küni sa'et 3:00 ler etrapida partlash weqesi yüz bérip, töt adem öldi bir kishi yarilandi.

Buningdin bir kün ilgiri saqchilar ghuljida yoluchilar aptobusini görüge éliwalghan bir xitayni étip öltürgen. Xitay metbu'atlirining xewer qilishiche, partlashning sewebi téxi éniqlanmighan bolup, weqening sewebi tekshürülmektiken.

Xongyenchi 2 - éléktir istansisining orni ürümchining jenubigha toghra kélidu. Da'iriler éléktir istansisidiki partlash Uyghur aptonom rayonidiki asasliq éléktir torigha tesir körsetmeydighanliqini jakarlighan.

Weqedin kéyin qoralliq saqchilar éléktir istansisi etrapidiki tashyollarni qamal qilghan. Da'iriler shinjang herbiy rayonigha tewe qisimlarni qutquzush we tertip saqlash ishlirigha seperwer qilghan.

Xitay metbu'atlirining neq meydandin igilishiche, aldi bilen ot apiti yüz bergen, andin may ponkitigha tutashqan. Mezkur éléktir istansisi xitay we Uyghur aptonom rayonining 9 - besh yilliq pilanidiki nuqtiliq qurulushlarning biri bolup, üch milyard yü'en meblegh ajritilghan. Xongyenchi, Uyghur aptonom rayonidiki tok ishlepchiqirish miqdari eng chong éléktir istansisi hésablinidu. (Erkin)