Aqsudiki bir zawutta yüz bergen partlashta 2 kishi qaza qildi

Seyshenbe küni Uyghur élining aqsu shehiridiki bir zawutta partlash yüz bérip, 2 kishi qaza qilghan we 7 si yarilan'ghan. Shundaqla partlashta bu zawut pütünley örülüp chüshken.

Tengritagh xewer torining melumatigha qarighanda, bu zawut miwe-chiwe qachilashta ishlitilidighan yumshaq pilastik matériyallarni ishlepchiqiridighan bolup, tekshürüshlerge asaslan'ghanda, weqe yüz bergende zawut ichide ximiyiwiy suyuqluq qachilan'ghan tungdin 30 nechchisi bar iken. Munasiwetlik orunlar bu partlashning mushu tunglargha ot kétish sewebidin kélip chiqqanliqini ilgiri sürmekte.

Weqe yüz bergendin kéyin, ot öchürüsh xadimliri neq meydan'gha kélip ot öchürüsh we yarilan'ghanlarni qutquzush ishlirini élip barghan. Xewerde melum bolushiche, partlashtin kéyin mezkur zawut mes'uli qéchip ketken. (Peride)